Речиси половина од новите патнички возила во ЕУ се електрични и хибридни
Речиси половина од сите новорегистрирани патнички возила во Европската унија од јануари до ноември оваа година се електрични и хибридни, а во ноември и најголемиот број од новите возила, покажуваат податоците на Европската асоцијација на производители на автомобили (АЦЕА).
Целосно електрични модели, плаг- ин хибриди или целосни хибриди сочинуваат околу 48 отсто од сите регистрации на нови патнички автомобили во ЕУ за 11 месеци, што е повеќе од 43 отсто во истиот период минатата година.
Во ноември, 16-ти последователен месец на раст, регистрациите на овие возила се зголемени за 6,7 отсто, а на годишно ниво за 13,3 отсто.
Регистрациите на автомобилите на бензин се зголемиле за 4,2 отсто, додека возилата со дизел се намалиле за 10,3 отсто во исто време, покажуваат податоците на АЦЕА објавени во средата.
Истовремено, регистрациите на целосно електрични автомобили се зголемени на годишно ниво за 16,4 отсто или на 144.378 возила, иако на најголемиот европски пазар за електрични возила, Германија, тие се намалени за 22,5 отсто на 44.942 возила.
Потрошувачите продолжија да ги фаворизираат хибридно-електричните возила, со пораст од 28,7 отсто во однос на претходната година, додека побарувачката за плаг-ин хибриди падна за 22,1 отсто.
Регистрациите на хибридно-електричните автомобили во речиси цела година досега на германскиот, францускиот и италијанскиот пазар надминаа 1,5 милиони возила, во однос на речиси 2,5 милиони сите возила.
И покрај растот на продажбата на електрични возила, AЦEA објави на почетокот на декември дека европскиот сектор за електрични возила е изложен на ризик да заостане зад другите региони без силна индустриска стратегија на ЕУ, во услови на кинеска доминација на синџирот на снабдување и американските стимулации за нејзините производители на автомобили.
Некои производители на автомобили и аналитичари, исто така, наведуваат граница на побарувачката за електрични возила во изминативе месеци.
Најголемиот европски производител на автомобили Фолксваген во октомври изјави дека побарувачката за електрични возила не се развива како што се очекуваше, а производителот на луксузни автомобили Мерцедес-Бенц предупреди на „брутален“ пазар за електрични возила поради големите намалувања на цените и неизвесниот синџир на снабдување.
Регистрациите на моделите на Фолксваген и Рено се зголемени во ноември за 11,4 отсто, односно за 6,1 отсто, додека во исто време оние на Стелантис паднаа за 7,3 отсто, објави AЦEA.
Во истиот месец, производителот на електрични автомобили Тесла постигна скок од речиси 45 отсто и учествуваше со речиси 22 отсто удел во регистрациите на целосно електричните автомобили во ЕУ.
Бројот на новорегистрирани возила во ноември во ЕУ, Британија и Европската асоцијација за слободна трговија (ЕФТА) е зголемен за шест отсто, на 1,08 милиони возила.