Русија: Франција одбива итен состанок на СБОН за авионската несреќа со украинските воени заробеници

 – Франција го отфрли барањето на Русија да свика седница на Советот за безбедност на Обединетите нации (ОН) денес, на која ќе се разговара за падот на рускиот воен авион со украински воени заробеници за размена, соопшти руската мисија во ОН.

Дмитриј Полјански, заменик-рускиот амбасадор во ОН, на Телеграм објави дека Франција го избрала патот на „злоупотреба на своите овластувања како претседавач со Советот за безбедност и одбива да го исполни барањето за итен состанок на Советот за безбедност на ОН поради терористичкиот напад на режимот во Киев“.

Според него, Франција се обидува „да купи време“ за Украина „да излезе со барем некакво веродостојно објаснување“ за смртоносната несреќа.

Руското Министерство за одбрана вчера ја обвини Украина дека го соборила воениот авион „Ил-76“ во кој биле заробените украински војници заради размена на заробеници.

Во авионот имало 65 заробени украински војници, шест членови на екипажот и тројца придружници. Екипажот и сите патници во авионот загинаа, се вели во соопштението, нарекувајќи го она што се случило „терористички напад“ организиран со цел да се обвини Русија за убиство на украинските војници.

Украинските власти „добро знаеле за планираниот транспорт“ однапред, нагласи Министерството.