Русија ја напаѓа Украина со најмоќни авиони: Распоредени стратешки бомбардери Ту-95 и ловци Су-57
Руските вооружени сили денеска извршија ракетен напад од големи размери на украинска територија, чија цел беа воени и енергетски објекти.
Според извештаите од украинските канали за надзор, во оваа операција учествувале шест стратешки бомбардери Ту-95МС, четири Ту-22М3, како и неколку ловци Су-57 од петтата генерација.
Два проектили, истрелани од руски бомбардери, влегле во украинскиот воздушен простор, по што е прогласена воздушна тревога низ целата земја.
Според истите извори, нападот започнал во текот на ноќта, кога беспилотните летала „Герањ-2“ извршиле напади врз неколку региони, вклучително и главниот град Киев, каде што биле регистрирани експлозии проследени со ракетни истрели.
Околу три часот наутро пристигнаа извештаи за погодена фабрика за преработка на гас Шебелински во регионот Харков – единствениот таков објект во Украина. Во раните утрински часови, детонации се слушнале и во Полтава, Балаклава и Харков, како и на аеродромот Староконстантинов во регионот Хмелницки.
Околу осум часот наутро во Полтава се случија нови експлозии, по што дел од областа остана без струја. Ударот го погодил и аеродромот во Миргород, додека нови детонации се регистрирани во Харков и Балаклава.
Од регионот Хмелницки пристигнуваат вести за продолжување на нападот на аеродромот Староконстантинов, овојпат со помош на беспилотни летала „Герањ-2“. Воените експерти сè уште не даваат конечни проценки за обемот на комбинираниот удар, но нагласуваат дека последиците може да бидат сериозни за Украина.
Нешто пред 7 часот (по локално време), украинските власти издадоа дополнително предупредување за воздушен напад, кое се однесува на целата земја. Украинското воено воздухопловство соопшти дека постои ризик од ракетни напади во сите региони за кои е издадено предупредување.
Опасноста е особено висока во регионите на Миколаев и Керсон, додека беспилотните летала летаат над многу области во североисточна Украина, со предупредувања за „закана од балистичко оружје од североистокот“.
Во исто време, гувернерот на Харков, Олех Синехубов, потврди дека имало „непријателски удари“ во два окрузи во областа, но информациите за евентуални жртви сè уште не се познати.
Во централна Украина, во регионот Полтава, напад (чија природа засега не е позната) предизвика штета на „енергетската инфраструктура“, оставајќи 164 домаќинства без електрична енергија. Локалната воена команда соопшти дека нема извештаи за жртви.
Во исто време седум лица се ранети во руски ракетен напад врз историскиот центар на Одеса, на југот на Украина. Украинскиот претседател Володимир Зеленски изјави дека станува збор за напад со балистички проектили и истакна дека норвешки дипломати се меѓу оние во епицентарот на нападот, без да прецизира дали има меѓу повредените.
Претходно беше објавено дека во Украина е прогласена голема воздушена тревога поради можноста за употреба на балистичко оружје од североисток. Исто така, ноќта меѓу 31 јануари и 1 февруари, руската војска извршила напади со беспилотни летала камикази „Геран-2“ врз неколку украински региони, што, според воените аналитичари, го отворило патот за последователен масивен ракетен напад.
