Сакате да го подобрите здравјето на мозокот? Вклучете ги овие пет намирници во вашата исхрана

Исхраната не само што влијае на нашите тела и физички изглед, туку и на нашите когнитивни способности. Сè поголем број истражувања покажуваат дека неурамнотежената исхрана може да ја наруши меморијата, концентрацијата и расположението, додека избалансираните оброци ја поддржуваат когнитивната функција. Бидејќи мозокот контролира сè, од донесување одлуки до регулирање на емоциите, грижата за тоа преку секојдневниот избор на исхрана е од суштинско значење за долгорочното здравје. Во видео , лекарката д-р Џанин Боуринг истакнува неколку видови храна кои, според неа, го подобруваат здравјето на мозокот.

Спанаќ

Спанаќот со години се смета за „суперхрана“, а д-р Боуринг истакнува дека е одличен за здравјето на мозокот. Исто така, познато е дека го забавува когнитивниот пад и ја подобрува меморијата.

Див лосос

Лососот е богат со здрави масти, а д-р Боуринг наведува дека е „полн со омега-3 масни киселини и DHA“. Консумирањето лосос е поврзано со подобра меморија, расположение и помал ризик од когнитивен пад. Дивиот лосос е особено препорачлив, доколку е можно да се набави.

Јаткасти плодови, особено ореви

Многумина истакнуваат дека оревите по изглед личат на мозокот, и тоа со добра причина – редовната консумација може да ја подобри меморијата, когнитивните способности и емоционалното здравје. Нивната единствена комбинација на хранливи материи помага во намалувањето на воспалението и оксидативниот стрес, кои се поврзани со опаѓањето на мозокот во староста.

Домати

Доматите се богати со ликопен, моќен антиоксиданс со антиинфламаторни својства. Д-р Боуринг ги опишува како „природно антиинфламаторно средство за мозокот“, па затоа нивното редовно консумирање може да помогне во намалувањето на воспалението и да го поддржи здравјето на мозокот.

Авокадо

Авокадото, според д-р Боуринг, е „богато со витамин Е, здрави масти и калиум – сите тие придонесуваат за оптимално здравје на мозокот“. Оваа комбинација на хранливи материи помага во заштитата на мозочните клетки и ја поддржува когнитивната функција, а докторот забележува дека некои истражувања сугерираат дека го подобрува протокот на крв во мозокот, што придонесува за подобра концентрација и меморија.