Сакате да живеете подолго и поздраво? Јадете ги овие шест намирници почесто

Кога ќе го слушнеме зборот „суперхрана“, честопати помислуваме на скапи, егзотични производи, но всушност тие се храна богата со хранливи материи која може значително да придонесе за нашето здравје. Диететичарката Џенифер Палијан објаснува дека исхраната богата со суперхрана може да го забави стареењето и да помогне во спречувањето на хронични заболувања.

„Иако целокупниот квалитет на вашата исхрана е клучен, науката сè повеќе ги истакнува специфичните намирници кои не само што го хранат телото, туку можат да заштитат и од хронични болести поврзани со стареењето. Овие намирници содржат соединенија кои го намалуваат воспалението, го подобруваат метаболизмот и можат да го продолжат здравиот животен век“, објаснува таа за SheFinds. Еве ги суперхраните што таа особено ги истакна.

Мешунки

Леќата, гравот, наутот и кикириките се полни со растителни протеини, влакна и антиинфламаторни соединенија, а се и многу достапни.

„Мешунките се нутритивни ѕвезди во борбата за долговечност. Освен што се заситувачки, тие содржат фитохемикалии кои помагаат во намалувањето на воспалението. Накратко, тие се скромни, но моќни“, вели Палијан.

Брокула

Овој зеленчук е богат со растителни влакна, витамини и сулфорафан – соединение со силни антиинфламаторни и антиоксидантни својства.

,,Брокулата е вистински исклучок меѓу зеленчукот. Податоците од повеќе од 12.000 возрасни лица покажуваат дека нејзиното консумирање еднаш или двапати неделно може да го намали ризикот од смрт за 43 проценти“, вели диететичарот.

Темно чоколадо

Ако избереме висококвалитетно чоколадо кое е богато со какао, тоа може да има позитивен ефект врз здравјето на срцето.

„Темното чоколадо не е исто што и млечното чоколадо – има мерливи придобивки за кардиоваскуларното здравје“, истакнува Палијан. Исто така, ја подобрува чувствителноста на инсулин и малку го подобрува расположението, но важно е да не се претерува.

„Умереноста е клучна“, додава таа.

Јаткасти плодови

Бадемите, оревите и другите јаткасти плодови се богати со здрави масти, растителни влакна, магнезиум и протеини од растително потекло. „Тие комбинираат вкус, практичност и долгорочни придобивки“, вели Палијан. Нивните ефекти врз воспалителните маркери како што се CRP и GGT укажуваат на моќна антиоксидантна активност.

Бобинки

Јагодите, боровинките и брусницата не се само вкусни – тие исто така го штитат мозокот, срцето и клетките. „Бобинките обезбедуваат невропротекција, намалувајќи го когнитивниот пад и оштетувањето на ДНК“, вели Палијан. Тој додава дека дури и преработените форми имаат придобивки, иако свежите се најдобри. За жал, само 17 проценти од возрасните ги јадат редовно.

Масна риба

Лососот, скушата и сардините се богати со омега-3 масни киселини кои го намалуваат воспалението и го штитат срцето. „Покрај кардиоваскуларните придобивки, омега-3 киселините помагаат и кај депресијата и го штитат мозокот од когнитивен пад“, заклучи Палијан.