Сања Лукаревска: “Почна исплатата на поврат на ДДВ за третото тримесечје“
Почна исплатата на повратот на ДДВ за третото тримесечје, соопшти вечерва директорката на Управата за јавни приходи (УЈП), Сања Лукаревска.
На гостување во МТВ, Сања Лукаревска порача дека повратот ќе биде во износ од околу 790 милиони денари кои ќе ги добијат 459.670 граѓани.
„Еден од најуспешните проекти е МојДДВ, сосема си го оправда своето постоење. Од денес почнуваме со исплата за претходното тромесечје. За третото тромесечје од 2023 година, повратот ќе биде околу 790 милиони денари, а ќе се однесува на 459.670 граѓани, корисници на оваа мерка. Бројката на корисници се зголемува и им благодарам на граѓаните кои се наши инспектори кои што пријавуваат и овозможуваат да се бориме со сивата економија“, изјави Сања Лукаревска.
Посочи дека повратот на ДДВ може да биде и повисок од моменталните 2.100 денари, односно тој постепено да се зголемува.
Во однос на наплатата на данокот на личен доход и данокот на добивка, Сања Лукаревска вели дека се собрани повеќе средства од она што било предвидено согласно со планот.
Со данокот на солидарност, како што посочи Сања Лукаревска, се очекува да бидат собрани три милијарди и единаесет милиони денари. Според податоците со кои располагаат, повеќе од 2/3 од компаниите ги подмириле обврските.
