Северна Кореја за првпат оваа година тестираше нова стратешка крстосувачка ракета
Северна Кореја во четвртокот соопшти дека за првпат тестирала нова стратешка крстосувачка ракета Pulhwasal-3-31, како дел од нејзините „редовни и задолжителни“ активности за развој и надградба на својот вооружен систем.
Ракетата наречена Pulhwasal-3-31 моментално е во развој и пробното истрелување немало влијание врз безбедноста на соседните земји, соопшти централната медиумска агенција на Северна Кореја (KCNA), додавајќи дека нема „никаква врска“ со регионална ситуација.
„Пробното лансирање е процес на постојано ажурирање на системот за оружје и е редовна и задолжителна активност на Генералната ракетна канцеларија и нејзините поврзани одбранбени научни институти“, соопшти KCNA без да открие детали за летот на ракетата.
Армијата на Јужна Кореја во средата соопшти дека открила лансирање на неколку крстаречки ракети од Северна Кореја кон Жолтото Море околу 7 часот наутро. Началникот на здружениот генералштаб на Јужна Кореја изјаи дека верува оти лансирањето тестирало надградба на способностите на постоечките ракети.
Тоа е прво познато лансирање на крстосувачка ракета на Северна Кореја од септември 2023 година, кога земјата тестираше две стратешки крстосувачки ракети со долг дострел со лажни нуклеарни боеви глави кон Жолтото Море.
Крстосувачките проектили летаат ниско и маневрираат, што ги прави подобри во избегнувањето на ракетната одбрана. Минатата година Северна Кореја ги лансираше стратешките крстосувачки ракети Hwasal-1 и 2, за кои се верува дека се способни да носат тактичко нуклеарно оружје. Hwasal на корејски значи стрела.
Лансирањето на крстосувачката ракета не е директно кршење на повеќе резолуции на Советот за безбедност на Обединетите нации со кои се забранува употребата на технологијата на балистички ракети од страна на Северна Кореја. Но, тоа може да претставува сериозна закана за безбедноста на земјата, бидејќи таквите проектили може да носат нуклеарни боеви глави.
Минатата недела, Пјонгјанг, исто така, тврдеше дека тестирал подводен дрон на нуклеарен погон во знак на протест против последните заеднички воени вежби на Јужна Кореја, САД и Јапонија.
Северна Кореја ги засили тензиите на Корејскиот Полуостров со тестови на оружје и остра реторика во изборната година за Јужна Кореја и САД.
Јужна Кореја соопшти дека започнува масовно производство на извидувачки беспилотни летала на средна височина со цел да ги распореди во 2027 година за да ги подобри способностите за надзор и да придонесе за одбраната на земјата.
