Семејството и пријателите се збогуваа со Џорџо Армани: Погребан е покрај родителите и постариот брат

Семејството и блиските пријатели се собраа на приватниот погреб на Џорџо Армани, кој почина минатата недела на 91-годишна возраст. Погребот се одржа во семејната капела во Ривалта, недалеку од Пјаченца, градот каде што е роден Армани.

Според желбите на покојниот дизајнер, неговото тело ќе биде кремирано по церемонијата, а потоа погребано во семејната капела. За време на погребот, Ривалта беше затворена за туристи и посетители. Погребот го водеше монсињор Џузепе Бусани, а конечниот погреб е планиран за среда, каде што ќе биде погребан покрај неговите родители и постариот брат.

Во знак на почит кон модниот гигант, сите продавници на Армани беа затворени попладнево, за да можат вработените во мир да му оддадат последна почит на човекот познат како „Ил Сињор Армани“.

Неговиот долгогодишен партнер и соработник, Панталео Дел’Орко, за италијанските медиуми изјави дека збогувањето ќе се одржи во семејниот круг и дека Армани ќе продолжи да се памети преку неговото модно наследство.

Армани работеше до последните денови, подготвувајќи ретроспективна изложба и модна ревија по повод 50 години кариера, која ќе се одржи на Неделата на модата во Милано кон крајот на септември. Компанијата сè уште не објави никакви промени во планираната програма.

Неговата смрт предизвика голема тага низ целиот свет, а многу познати уметници, спортисти, политичари и бизнисмени му оддадоа почит. Во текот на викендот, илјадници луѓе дојдоа во седиштето на Армани во Милано за да оддадат почит, каде што неговиот ковчег беше изложен, украсен со бели рози.

Жителката на Милано, Алесандра Торкио, изјави дека чувствува длабока тага поради загубата на големиот стил и неизбришливиот талент и нагласи колку Армани остави значаен белег во светот на модата.

Џорџо Армани остава зад себе бизнис империја што вклучува висока мода и дизајн на ентериер, а неговото име останува синоним за елеганција и едноставност.