Се подготвува уште пожесток напад врз Путин: Објавени детали
Европската Унија размислува да исклучи 20 банки од SWIFT во обид да изврши притисок врз Русија.
Европската Унија размислува да исклучи повеќе од 20 банки од меѓународниот систем за плаќање SWIFT, да ја намали ценовната граница на руската нафта и да го забрани гасоводот „Северен тек“ , како дел од новиот пакет санкции насочени кон зголемување на притисокот врз Москва за прекин на војната во Украина, објави „Блумберг“.
Европската комисија се консултира со земјите-членки во врска со овие планови, објави американската агенција, повикувајќи се на извори запознаени со ова прашање.
Одлуката за временската рамка за можни ограничувања сè уште не е донесена, рекоа луѓето, кои не сакаа да бидат именувани.
Санкциите на ЕУ бараат поддршка од сите земји-членки и можат да бидат изменети пред официјално да бидат предложени и усвоени.
ЕУ, исто така, разгледува дополнителни забрани за трансакции за околу 20 банки и нови трговски ограничувања во вредност од околу 2,5 милијарди евра, а воедно се стреми дополнително да ги ограничи приходите на Русија и нејзината способност да добие технологија потребна за производство на оружје.
Како дел од пакетот што моментално се разгледува, ЕК планира да предложи и намалување на ценовната граница за руската нафта на околу 45 долари за барел, велат изворите.
Клучно е што планот на ЕУ за санкционирање на гасоводот „Северен тек“ веќе ја има поддршката од Германија.
За германскиот канцелар Фридрих Мерц, кој минатата недела во Рим изјави дека го поддржува предлогот на ЕК „да се започне со работа на европски мерки против гасоводот Северен тек 2“, клучната надеж е дека санкциите можат да ги олеснат дебатите во земјата за оживување на проектот.
Гласините за можно оживување на проектот за гасоводот се засилија по напорите на Трамп да посредува во мировните преговори меѓу Русија и Украина.
Дури и без формална забрана, активирањето на „Северен тек 2“, кој беше изграден, но никогаш не беше сертифициран од Германија и беше делумно оштетен во експлозиите во 2022 година, не се очекува во блиска иднина.
