Се сруши мост во Германија

Мостот Карола ненадејно се урна среде ноќ во германскиот град Дрезден.

Делови од мостот, кој го поврзува историскиот стар град со новиот град, паднале во реката Елба, додека постои опасност од уривање на други делови од мостот, пренесува „Билд“.

Граѓаните велат дека слушнале тресок околу три часот по полноќ.

„Слушнав огромна експлозија, ме разбуди. Не можев да видам ништо во мракот, а потоа слушнав сирени“, изјави жителот Хендрик Пач за „Билд“.

Мостот Карола е еден од најважните мостови во Дрезден. Тој беше уништен во Втората светска војна и повторно изграден како автомобилски мост со четири ленти за време на Германската Демократска Република (ГДР).

Според Билд, три сегменти од мостот се во вода. Службите за итни случаи ја опколија целата област околу мостот Карола и самиот мост.

„Добивме пријава во 3:01 часот, мостот веќе беше во Елба. За чудо, никој не е повреден“, изјави портпаролот на полицијата за „Билд“.

Службите за итни случаи претпоставуваат дека постои акутен ризик од колапс.

„Очекуваме дека нови делови од мостот би можеле да се урнат“, изјави портпаролот на противпожарната служба на местото на настанот во средата наутро.

Луѓето по секоја цена треба да се држат подалеку од мостот.

„Постои ризик по живот“, рече портпаролот.