Се урна авион во Швајцарија, со тричлено семејство? Огнената топка ги исплаши локалните жители

Тројца патници загинаа кога  во понеделникот вечерта се урна мал авион во швајцарската долина Енгадин.

Од кантоналната полиција Граубинден за Блик го потврдија инцидентот, а на местото веднаш пристигнаа хеликоптер и спасувачките служби.

Авионот Екстра ЕА-400 со еден мотор полетал од аеродромот Самедан во 17:20 часот за Роскилде, Данска, се вели во соопштението во вторникот наутро. Две минути подоцна удрил во станбена населба во северната периферија на селото и целосно изгорел.

Сите патници во авионот, а се верува дека имало тројца, загинале. Авионот долетал од Данска на 13 март и бил на повратен лет кога се случила несреќата.

Идентификацијата на жртвите е во тек, а германски Билд јавува дека во неа наводно загинало германско тричлено семејство.

Според данскиот медиум Екстрабладет, жртвите се брачна двојка и нивниот син. Сè уште нема официјални потврди.

Сведоците им опишаа на медиумите драматични сцени.

„ Во последните три секунди пред падот, авионот се заврте околу својата оска и полета кон земјата. Потоа имаше експлозија и огромна огнена топка “, рече еден сведок.

Сведоците рекоа дека чувствуваат мирис на горење, додека полицијата ја опколи областа.

Во тек е истрага за причините за несреќата.