Силјановска-Давкова: Во моментов нема ништо поважно од политиката на проширување на ЕУ

Претседателката Гордана Силјановска-Давкова не ја коментираше вчерашната изјава на бугарскиот претседател Румен Радев во врска со ветото и преговарачката рамка денес во Тирана, но нагласи дека тоа не значи дека се согласува.

„Апсолутно одговорот, ако можам да кажам така, не е насочен кон мене, туку е одговор на она што ЕУ го прави и мора да го направи за да покаже дека во моментов нема поважна политика од политиката на проширување и дека таа е неразделна од заедничката надворешна и безбедносна политика, а многу пати ни беше нагласено како земја која е целосно усогласена со европската надворешна и безбедносна политика“, изјави денес претседателот.

Силјановска-Давкова рече дека едно е да се знае што е лично државно искуство, а друго е да се знае што е реалност.

„Потврдив, потврдувам и знам дека сите европски политичари се свесни дека тажната македонска неевропска приказна нема да запре со нас, тоа ќе биде една од понатамошните приказни, и покрај мојата радост за напредокот на некои земји во регионот“, рече таа.

Претседателот повтори дека не треба да бидеме жртви на идентитетски прашања.