Советот на ЕУ одобри исплата на нови 4,2 милијарди евра помош за Украина
Советот на Европската Унија вчера ја одобри исплатата на втората транша финансиска помош во рамки на украинскиот механизам, во износ од околу 4,2 милијарди евра во форма на грантови и заеми, наменети за поддршка на макро-финансиската стабилност и функционирањето на јавната администрација.
Со усвоената одлука, Советот заклучи дека Украина ги исполнила неопходните услови и реформи предвидени во Планот за Украина за да може да добие нова транша од средствата од украинскиот механизам. Советот ја истакна важноста за исплата на овие средства што е можно поскоро, со оглед на тешката фискална ситуација во Украина.
Планот за Украина вклучува мерки насочени кон закрепнување, реконструкција и модернизација на земјата, како и реформи кои владата планира да ги преземе во следните четири години како дел од процесот на пристапување во ЕУ. Планот беше одобрен од Советот на ЕУ во мај годинава и предвидува Унијата преку украинскиот механизам да ѝ додели финансиска поддршка на Украина во износ до 50 милијарди за периодот од 2024 до 2027 година.
