„Сончев систем со шест планети во совршена синхронија“ е пронајден на Млечниот Пат

Астрономите открија редок синхронизиран Сончев систем со шест планети за кои се вели дека се движат како голем космички оркестар, недопрени од надворешни сили од нивното раѓање пред милијарди години.

Откритието, објавено во средата, може да помогне да се објасни како се создале соларни системи низ галаксијата „Млечен пат“, пишуваат странските медиуми, пренесува Телеграф.

Се вели дека овој „систем“ е оддалечен 100 светлосни години во соѕвездието Кома Береникина.

Пар сателити за лов на планети – Тес на НАСА и Кеопс на Европската вселенска агенција – се здружија за набљудување.

Сепак, ниту една од планетите во совршена синхронизација не се наоѓа во таканаречената зона погодна за живот на ѕвездата, што значи мали или никакви шанси за живот, барем како што го знаеме.

Адриен Лелеу од Универзитетот во Женева, кој беше дел од меѓународен тим, ги објави резултатите во списанието Nature.

Овој Сончев систем е единствен затоа што сите шест планети се движат како совршено синхронизирана симфонија, велат научниците. Во техничка смисла, таа е позната како резонанца која е „прецизна, многу редовна“, вели коавторот Енрик Пале од Институтот за астрофизика на Канарските Острови.

Според научниците, сите соларни системи, вклучувајќи го и нашиот, се смета дека започнале вака. Но, се проценува дека само 1 од 100 системи ја задржале таа синхроничност, а нашиот не е еден од нив.