Социјалните мрежи во Украина горат: “Валериј Залужни е минато, Володимир Зеленски го отстрани. Ако неговиот миленик дојде на чело на Армијата – готови сме!“
Дали претседателот на Украина, Володимир Зеленски, навистина се обиде да го отстрани врховниот воен командант, Валериј Залужни, кој е и најпопуларниот Украинец ? Најкраткиот одговор е: Каде што има чад, има и оган.
Гласините најпрво се појавија на украинските профили на социјалната мрежа Телеграм, а на својот профил на социјалната мрежа Фејсбук реагираше и поранешниот парламентарец Борислав Береза.
„Мои извори од Кабинетот на претседателот известија дека Валериј Залужни е сменет од функцијата врховен командант!“ стои во објавата на Борислав Береза.
Својата верзија за оставката на Валериј Залужни ја претстави и претставникот од партијата Евросолидарност, Олексиј Гончаренко.
„Неговото разрешување е официјално објавено, но се уште нема официјален декрет. Му беше понудена функцијата амбасадор во една од европските земји. Тој одби“, напиша Олексиј Гончаренко во објава на социјалната мрежа Телеграм.
Треба да се знае дека и двајцата се членови на партијата на поранешниот претседател Петро Порошенко и критичари на Володимир Зеленски.
Набрзо се вклучија и медиумите, па Јуриј Бутусов, главниот уредник на веб-сајтот Censor.net, кој традиционално го поддржуваше Валериј Залужни и го критикуваше Володимир Зеленски, објави, повикувајќи се на извори, дека претседателот веќе го потпишал указот за оставка на Валериј Залужни, но не го објавил јавно затоа што во тек се консултациите со странските партнери. Малку подоцна Јуриј Бутусов на својот профил на социјалната мрежа Фејсбук напиша нова објава во која апелира првиот човек на воената разузнавачка служба Кирило Буданов во никој случај да не биде именуван за нов врховен командант.
Јуриј Бутусов напиша дека Кирило Буданов немал искуство да командува со единица поголема од неговата и дека „бил крајно некомпетентен во планирањето и извршувањето“ на операциите за слетување на островот Змија и во близина на нуклеарната централа „Енергодар“ кога Украина се обидела да приземји војници, но двете операции завршиле во неуспех.
Замислете колку животи ќе ја чини нашата земја ваквото назначување“, предупреди Бутусов.
Сепак, новинарот Роман Цимбаљук набрзо објави дека Володимир Зеленски веќе го назначил Кирило Буданов за врховен командант наместо Валериј Залужни. И весникот „Украинска правда“, во сопственост на бизнисменот и медиумски магнат Томаш Фиала, повикувајќи се на извори, всушност ја повтори верзијата на Олексиј Гончаренко дека на Валериј Залужни му била понудена функцијата амбасадор во една од европските земји, но тој ја одбил.
Министерството за одбрана на Украина излезе со демант.
„Почитувани новинари, веднаш ви одговараме на сите: не, тоа не е точно“, пишува во публикацијата, која дополнително ги зголеми шпекулациите.
Конечно, околу час и половина откако се појавија гласините за оставка на Валериј Залужни, прес-секретарот на претседателот, Сергеј Никифоров, официјално го демантираше тоа. Тој им кажа на новинарите дека Володимир Зеленски не го разрешил врховниот командант.
„Дефинитивно не. Претседателот не го разреши врховниот командант“, одговори Сергеј Никифоров на прашањето дали Володимир Зеленски го потпишал соодветниот указ.
Постојат две можни верзии за оваа приказна. Според првата, Володимир Зеленски всушност го известил Валериј Залужни за неговата оставка, а тимот што го поддржува Врховниот командант дознал за тоа и решил да ја објави информацијата како превентивна мерка уште пред украинскиот претседател да го објави соодветниот указ. Друга опција е Володимир Зеленски и Валериј Залужни разговарале за можноста за отказ, но не постигнале договор. Во која било од овие опции, логиката на постапките на поддржувачите на врховниот командант е јасна – да се организира јавен притисок врз Володимир Зеленски, можеби дури и со вклучување на западните партнери за да се спречи разрешувањето на генералот Валериј Залужни.
Сепак, јавна тајна е дека има конфликт меѓу Володимир Зеленски и Валериј Залужни. Гласините се интензивираа есента 2023 година по неуспехот на украинската офанзива и поради претседателските избори кои требаше да се одржат во март, но беа одложени поради воената состојба. Популарната верзија во украинските политички кругови е дека Володимир Зеленски се откажал од плановите за одржување избори поради страв од конкуренцијата на Валериј Залужни бидејќи, според резултатите од серијата анкети, генералот е толку популарен што би можел да го победи актуелниот претседател.
