Спречена е сериозна закана од шумски пожар на Осоговските Планини

Благодарение на брзата интервенција на шумочуварите од подружницата Осогово – Крива Паланка на Јавното претпријатие „Национални шуми“, спречена е сериозна закана од шумски пожар на Осоговските Планини.

Како што информираше денеска Стојанче Ангелов, директор на Дирекцијата за заштита и спасување и раководител на Главниот штаб за управување со кризи, шумочуварите вчера попладне, на надморска височина од 2000 метри, под врвот Царев Врв во месноста Алтн врв, пронашле повеќе од триесет автомобилски гуми, картон, внатрешни гуми и суви борови гранки и стебла подготвени за палење.

Надлежните служби веќе спроведуваат истрага за откривање на сторителите. Од Дирекцијата апелираат до граѓаните да пријават сомнителни активности и потсетуваат дека палењето оган на отворено, особено во летните месеци, е строго забрането и казниво со закон.

Во услови на екстремно високи температури и зголемен ризик од пожари, ваквите намерни обиди за палење се особено загрижувачки и претставуваат директна опасност за шумите, животната средина и безбедноста на граѓаните.