Станува се потопло и потопло на Северниот пол: Температурите за 20 степени повисоки од вообичаеното

Температурите на Северниот пол беа 20 степени над просекот во неделата, поради што мразот почна да се топи

Температурите северно од норвешкиот Свалбард се веќе за 18 степени повисоки отколку што беа од 1991 до 2020 година, според моделите од метеоролошките агенции во Европа и САД. Температурите на воздухот се движат околу нула степени.

„Во текот на зимата е забележано екстремно затоплување. Ова веројатно не беше најекстремниот настан досега, но покажува што може да се случи на Арктикот“, изјави научникот Мика Рантанен од Финскиот метеоролошки институт.

Согорувањето на фосилните горива ја загреа планетата за 1,3 степени во споредба со прединдустриското време, но половите се загреваат многу побрзо како што се загрева морскиот мраз. Зголемувањето на просечните температури доведе до почести топли лета и благи зими.

Џулијан Николас, научник во Европската служба за климатски промени Коперник, рече дека невообичаено благите температури во текот на поларната зима се поврзани со областа со низок притисок над Исланд, која силно го насочува топлиот воздух кон Северниот пол.

Невообичаено топлите мориња во североисточниот дел на Атлантикот го засилуваат затоплувањето предизвикано од ветровите.

„Овој тип на појава е релативно ретка, но без дополнителна анализа не можеме да знаеме колку е вообичаена. Знаеме дека слична ситуација веќе се случи во 2018 година“, рече Николас, според Гардијан.

Податоците од Коперник покажуваат дека просечните температури биле повеќе од 20 степени над просекот во близина на Северниот пол, со апсолутни температури над минус еден степен.

Наодите ги потврди арктичката пловка, која во неделата забележа температура на воздухот од 0,5 степени.

Арктикот се загрева речиси четири пати побрзо од глобалниот просек од 1979 година, а епизодите на екстремна топлина стануваат се почести и со зголемен интензитет.