Столтенберг во среда во Скопје со лидерите на НАТО-сојузниците од Балканот

Од Александра Последно обновено Ное 17, 2023

Генералниот секретар на НАТО, Јенс Столтенберг, на почетокот на следната недела ќе ја започне четиридневната балканска турнеја, за време на која ќе ги посети Босна и Херцеговина, Косово, Србија и Македонија.

Столтенберг ќе ги посети земјите од Западен Балкан од 19 до 22 ноември, соопшти НАТО.

Турнејата започнува во недела, кога Столтенберг ќе пристигне во Босна и Херцеговина и истиот ден ќе има работна вечера со членовите на Претседателството на БиХ.

Во понеделник, на 20 ноември, планирани се средби со претседавачот на Советот на министри на БиХ, Борјана Кришта и високиот претставник во БиХ, Кристијан Шмит.

За време на посетата на Босна и Херцеговина, предвидена е обиколка на седиштето на НАТО во Сараево, каде Столтенберг ќе оствари средба со раководството.

Истиот ден тој ќе отпатува за Косово, каде ќе се сретне со претседателката Вјоса Османи-Сандриа и со премиерот Албина Курти.

Како што е најавено од НАТО, Столтенберг ќе го посети кампот на НАТО КФОР Нотинг Хил на Косово и ќе се сретне со командантот генерал-мајор Озкан Улутас и ќе им се обрати на војниците. Предвидена е и средба со лидерот на советодавниот тим на НАТО.

Генералниот секретар на НАТО во вторник на 21 ноември ќе престојува во Белград, каде што треба да се сретне со српскиот претседател Александар Вучиќ и со премиерката Ана Брнабиќ.

Столтенберг ќе разговара и со српски научници кои ќе ја претстават технологијата развиена во контекст на проектите на НАТО „Наука за мир и безбедност“.

Истиот ден, тој ќе отпатува за Скопје, каде ќе има средби со претседателот на Северна Македонија, Стево Пендаровски и премиерот Димитар Ковачевски, како и со претседателот на македонското Собрание Талат Џафери, а ќе се обрати пред пратениците.

Во среда, на 22 ноември, Столтенберг во Скопје ќе учествува на средба со лидерите на земјите од регионот кои се членки на НАТО алијансата, на која се поканети албанскиот премиер Еди Рама, хрватскиот претседател Зоран Милановиќ, црногорскиот премиер Милојко Спајиќ и словенечкиот премиер Роберт Голоб.