Телескопот Џејмс Веб сними астероид кој се сметаше за опасен за Земјата
Вселенскиот телескоп Џејмс Веб на американската вселенска агенција НАСА направи нови фотографии од астероид кој претходно се сметаше за најголема закана за Земјата.
Претходно оваа година, астероидот 2024 YR4 се најде на врвот на листата на објекти кои се набљудуваат за целите на планетарна одбрана, откако се проценува дека има 5 отсто шанси да се судри со Земјата во 2032 година. Според извештаите, постои мала шанса вселенската карпа, која доаѓа во насока на Земјата на секои четири години, да удри во Месечината во следната деценија.
Астероидот првпат го привлече вниманието на НАСА и на астрономите кога се појави во табела за ризик од удар Sentry, која ги следи астероидите со поголема од нула шанса да удрат во Земјата.
Во тоа време, тоа беше единствениот објект меѓу 37.000 познати големи вселенски карпи со какви било реални шанси за судир, со веројатност од 3,1 отсто. Сепак, на крајот на февруари беа направени прецизни набљудувања за подобрување на пресметките и на крајот беше откриено дека шансите за судир меѓу Земјата и астероидот се нула.
НАСА и Европската вселенска агенција (ESA) објавија фотографии од астероидот, кој се појави како бледа, нејасна точка.
Како „најмоќното око на човештвото во вселената“, Веб ја потврди должината на астероидот, која е меѓу 53 и 67 метри, така што одговара на големината на десеткатница. Ова е и најмалиот објект забележан од најголемиот и најмоќниот вселенски телескоп.
По средината на април, астероидот 2024 YR4 ќе се оддалечи премногу и ќе стане премногу слаб за да може да се следи со телескопи на земја, но Веб повторно ќе го набљудува кон крајот на април и почетокот на мај.
Астрономот Ендрју Ривкин од Универзитетот Џон Хопкинс, кој помогна со набљудувањата, рече дека тие служеле како вредна вежба за други астероиди кои би можеле да ја загрозат Земјата.
„Сето ова ни дава простор да откриеме какви се другите објекти со големина на астероидот 2024 YR4, вклучувајќи го и следниот што би можел да ни се упати“, рече тој.
Иако 2024 YR4 не се смета за закана за Земјата, сепак постои мала шанса да удри во Месечината. По набљудувањата на Веб, НАСА ги процени шансите астероид да удри во Месечината на 22 декември 2032 година и тие се зголемија од 1,7 на 3,8 проценти.
Дури и да се случи судир, НАСА тврди дека нема да ја промени орбитата на Месечината околу Земјата.
Астероидот 2024 YR4 беше откриен од системот АТЛАС финансиран од НАСА во Чиле. Иако тој не е закана за Земјата, астрономите сакаат да го следат. Претставува вредна можност за проучување на вселенските карпи, исто како и неговиот поголем „брат“ Апофис, кој исто така некогаш се сметаше за закана за нашата планета.
Научниците веруваат дека таквото истражување може да им помогне на вселенските агенции да ги подобрат стратегиите за одбрана на планетата во случај кога некогаш во иднина некој астероид навистина да претставува закана за Земјата.
