Темно предупредување од најмоќниот американски генерал до Володимир Зеленски: “Имате уште 45 дена!“
На Украина и остануваат уште само 45 дена да постигне значителни успеси во својата контраофанзива против руските сили пред почетокот на есента и зимата. Генералот Марк Мили, претседател на Здружениот Генералштаб на вооружените сили на САД, тврди дека маневрирањето ќе стане многу тешко кога регионот ќе биде зафатен од есенски дождови, пишува Daily Mail.
На почетокот на летото, Украина почна да ги напаѓа руските одбранбени линии со цел да стигне до Азовското Море, што би ја поделило окупираната украинска територија на два дела. Добивките во областите каде што Русите поставуваат мини веќе една година се мали, но пред една недела украинските генерали известија дека пробиле во првите редови.
„Се одвиваше побавно од очекуваното, но тоа е разликата помеѓу војна на хартија и вистинска војна. Ова се вистински луѓе во вистински возила кои се пробиваат низ вистински мински полиња. Смртта, уништувањето и конфликтот се исто така реални. Сè уште има разумно време – веројатно околу 30 до 45 дена до почетокот на борбата против временските услови“, вели Марк Мили.
Во неделната емисија на BBC, тој додаде дека барем делумно успеале во својот план и дека тоа е важно. Во истата емисија, адмиралот Сер Тони Радакин, началникот на Генералштабот за одбрана на Велика Британија, кажа дека Украина победува затоа што Русија не успева да ја освои територијата.
Во меѓувреме, директорката на шпанската добротворна организација Ема Игуал (32 г.) и канадскиот хуманитарен работник Ентони Ихнат беа убиени вчера во руско гранатирање. Тие, заедно со уште двајца доброволци, патувале во близина на линијата на фронтот на украинската офанзива. Тешко ранети се и Рубен Мавик од Германија и Јохан Матијас Тир од Шведска.
Четиричлениот тим од хуманитарната организација „Пат за помош“ помагаше во евакуацијата на ранетите од фронтот кои се погодени од гранати во близина на Бахмут во источна Украина и беа заробени во запалено комбе. Организацијата соопшти дека групата била во мисија да ги процени потребите на цивилите во предградијата на Бахмут, каде што се одржа најдолгата и најкрвавата битка во војната пред да падне градот во рацете на руските војници во мај.
