ТИРЗ и ЏЕТРО ќе потпишат меморандум за соработка
Дирекцијата за технолошки индустриски развојни зони ТИРЗ и Јапонската организација за надворешна трговија ЏЕТРО ќе спроведуваат заеднички активности за промоција на инвестициски можности меѓу Северна Македонија и Јапонија.
Со меморандумот за соработка, што ќе биде потпишан денеска во Скопје по повод 30-годишнината од воспоставувањето на дипломатско-економските односи меѓу Јапонија и Северна Македонија, е предвидено и унапредување на соработката на јапонски и македонски компании во повеќе сектори, како и во делот на привлекување на јапонски компании да инвестираат во земјава.
На потпишувањето на меморандумот во Клубот на пратеници ќе присуствуваат и вицепремиерот задолжен за економски прашања и инвестиции, Фатмир Битиќи и министерот за економија, Крешник Бектеши.
ТИРЗ во следниве три дена е домаќин на јапонска делегација предводена од генералниот директор во јапонското Министерство за економија, трговија и индустрија, Такехико Матсуо и директорот на ЏЕТРО Виена, Татсуо Камино, а во делегацијата се и претставници на повеќе јапонски компании. Најавени се средби и со македонски компании членки на Стопанската комора на Северна Македонија.
