Трамп вели дека сè уште не одлучил дали да воведе санкции против Русија: Ќе го направам тоа доколку е потребно

Американскиот претседател Доналд Трамп изјави дека ќе воведе дополнителни санкции против Русија, но само „доколку е потребно“, објави Си-Ен-Ен.

„Ако мислам дека Русија нема да склучи договор или нема да го запре крвопролевањето, ќе ги искористам доколку е потребно“, им рече Трамп на новинарите во авионот „Ер Форс Уан“.

Тој додаде дека сенаторите, од кои многумина го поддржаа законот за зајакнување на санкциите против Русија, ја оставаат конечната одлука нему.

„Не сум разговарал со нив за тоа. Тие имаат закон, тоа ќе зависи од мене, тоа е моја опција. Тие го направија така и би заштедиле многу време ако тоа се случи. Значи, согласен сум со тоа. Не одлучив да ги користам. Тоа е многу силен закон“, додаде американскиот претседател.

На почетокот на мај, републиканскиот сенатор Линдзи Греам разви план за катастрофални санкции на САД против Русија. Документот беше поддржан од мнозинството сенатори.

Со него се предвидува САД да воведат царини од 500 проценти за земјите што купуваат нафта, нафтени производи, природен гас или ураниум од Русија.

Сепак, „Волстрит џурнал“ вчера објави дека администрацијата на Трамп не е задоволна од законот на Греам, поради што претставниците на Белата куќа се обидуваат значително да ги ослабат мерките.

Еден предлог беше да му се дозволи на американскиот лидер да одлучи врз кого ќе се воведат санкции. Администрацијата на Трамп, исто така, предложи да се замени фразата „сите мора“ со „може“.