Трамп го направи она што Европа никогаш не го направи – ја „уништи“ руската нафта: Финска направи потег што другите го избегнаа

Ненадејниот потег на американскиот претседател Доналд Трамп да воведе санкции врз најголемите руски нафтени компании нема да ја парализира воената машина на Владимир Путин, но ќе ѝ помогне на Европската унија засекогаш да ја исфрли руската нафта од блокот.

Во среда, Трамп објави нови санкции насочени кон рускиот Лукоил и државната компанија Роснефт, првите американски санкции против Москва откако тој ја презеде функцијата. Деталите за новите мерки сè уште се разработуваат, но теоретски тие би можеле да ги принудат двете фирми да ги продадат своите средства и да ги сопрат преостанатите испораки на нафта преку цевководи до Европа, пишува Политико.

„Ова е значаен чекор и ќе ги принуди европските земји и компании кои продолжија да увезуваат енергија да ги преиспитаат тие трансакции“, изјави Кимберли Донован, експерт за санкции во Атлантскиот совет.

Соопштението доаѓа еден месец откако Трамп остро ја критикуваше Европа за „непростливото“ продолжување на купување енергија од Русија, што вкупно обезбедува една четвртина од приходите за воениот буџет на Кремљ. Потоа, тој, исто така, издаде ултиматум до Европа, пишувајќи:

„Подготвен сум да воведам големи санкции врз Русија кога сите земји-членки на НАТО ќе се согласат и ќе почнат да го прават истото и кога сите земји-членки на НАТО ќе престанат да купуваат нафта од Русија.“

Сега тој го направи тоа.

За Москва, новите санкции ќе значат моментален пораз, но веројатно нема да ги ослабнат нејзините воени напори во Украина, пишува Политико.

„Роснефт“ и „Лукоил“ учествуваат со две третини од 4,4 милиони барели сурова нафта што Русија ги извезува дневно, според Дејвид Фајф, главен економист во консултантската компанија „Аргус Медиа“.

Но, едно место каде што мерките би можеле да имаат јасен ефект е Европа. Уште од почетокот на инвазијата на Москва врз Украина пред повеќе од три години, ЕУ се бори да ја прекине својата зависност од руската енергија. Брисел воведе ембарго за руска сурова нафта, гориво и јаглен што влегуваат во блокот по море и го намали уделот на Кремљ на пазарот на гас на ЕУ од 45 на 13 проценти.

„Роснефт“, кој некогаш поседуваше рафинерии и го контролираше протокот на нафта во Германија, во голема мера беше истиснат од Европа откако Берлин ја презеде контролата врз нејзината локална подружница кон крајот на 2022 година.

Во четврток, ЕУ, исто така, ги заостри санкциите против компанијата контролирана од Кремљ.

Сепак, приказната е поинаква со Лукоил. Најголемата приватна нафтена компанија во Русија управува со стотици бензински пумпи низ цела ЕУ, вклучувајќи околу 200 во Белгија, поседува големи рафинерии во Романија и Бугарија и има 45 проценти удел во фабрика за преработка на гориво во Холандија. Тие снабдуваат нафта со Унгарија и Словачка, кои остануваат зависни од Москва за помеѓу 86 и 100 проценти од нивниот увоз. Искористувајќи го ослободувањето од санкции, двете земји упорно одбиваат да ги прекинат врските со Москва, и покрај силниот притисок од ЕУ.

Досега, Брисел постојано не успеваше да ја таргетира компанијата, иако е поврзана со заобиколување на санкциите во рамките на блокот.

Работите би можеле да се променат сега.

Министерството за финансии на САД соопшти дека може да воведе санкции врз секој што соработува со руски фирми, што значи дека ниедна банка во Европа сега нема да обработува плаќања за нив, рече Донован, експертот за санкции.

Во четврток, Европската комисија, исто така, објави дека размислува за сопствена забрана за трансакции со Лукоил. За Унгарија и Словачка, новите санкции особено поттикнуваат стравувања дека снабдувањето со нафта би можело целосно да се прекине.

Доколку санкциите бидат спроведени, тоа би „довело до запирање на увозот“, призна еден словачки функционер, кој остана анонимен, додавајќи дека владата „најверојатно“ ќе побара ослободување од Америка.

Всушност, ефектите од мерките веќе почнаа да се чувствуваат. Финската енергетска компанија „Несте“ во четврток ги прекина испораките на гориво до подружницата на „Лукоил“, „Тебоил“, откако САД и Велика Британија воведоа санкции врз фирмата.