Трамп го спречил атентатот врз иранскиот врховен лидер? Израел имал план, но „паднало“ вето

Извор од Белата куќа на САД откри за Ројтерс дека претседателот Доналд Трамп во последните денови ставил вето на израелскиот план за атентат врз врховниот лидер на Иран, ајатолахот Али Хамнеи.

Според официјални лица, Трамп го отфрлил планот по консултациите со израелскиот премиер Бенјамин Нетанјаху, како и со неговите советници.

Иако американската администрација беше однапред информирана за можната операција, Трамп на крајот зазеде став дека Израел не треба директно да се вклучува – барем не додека имаше реална шанса за дипломатско решение.

По неколку недели разговори и испраќање дипломатска порака до Иран преку посредници од Заливот, Трамп веруваше дека е можен договор со Техеран. Сепак, Израел верува дека е време за воен одговор сè додека не се напушти нуклеарната програма.

Иако нападот врз Иран се случи без вмешаност на американската војска, Белата куќа потврди дека Израел однапред го информирал Вашингтон, а Трамп подоцна изјави дека – иако не дал зелено светло – имал сознанија за плановите.

Ова необично вето на Трамп и избегнувањето на директно американско вклучување значи дека може да има затегнување на односите меѓу САД и Израел или балансирање на влијанието во регионот. За некои, ова дава надеж за дипломатско решение, додека други стравуваат дека Вашингтон бил премногу пасивен и дека Израел ја искористил „слабата“ американска позиција.