Трамп му се закани на Маск дека ќе се соочи со сериозни последици ако ги финансира демократите

Претседателот на Соединетите Американски Држави, Доналд Трамп, изјави дека ќе има „сериозни последици“ доколку Илон Маск ги финансира демократските кандидати во нивната борба против републиканците кои ќе поддржат сеопфатен закон за даноци и трошење.

„Ако го стори тоа, ќе мора да ги трпи последиците за тоа“, изјави Трамп за NBC News во телефонско интервју, но одби да даде повеќе детали.

Трамп, исто така, рече дека нема желба да работи на подобрување на односите со Маск откако расправијата меѓу нив двајца стана јавна.

„Не“, одговори кратко и категорично Трамп кога новинарите го прашаа дали има желба да го стори тоа.

Покрај тоа, американскиот претседател го обвини Маск дека покажува „непочитување кон функцијата претседател“, нагласувајќи дека, според Трамп, ова е „многу лоша работа“.

Во четврток, Маск го критикуваше Трамп во серија објави на X, вклучувајќи ја и сега избришаната објава во која се истакнуваат поранешните врски меѓу американскиот претседател и покојниот сексуален престапник Џефри Епштајн.

„Тоа се нарекува стара вест. Тоа се стари вести за кои се зборува со години. Дури и адвокатот на Епштајн рече дека немам никаква врска со тоа. Тоа се стари вести“, рече Трамп.

Тој истакна дека нема да ги откаже федералните договори со компаниите на Маск и изрази сомнеж дека противењето на Маск на контроверзниот закон ќе го загрози неговото усвојување.

„Републиканската партија никогаш порано не била толку обединета. Никогаш не била. Всушност, таа е пообединета отколку што беше пред три дена“, рече тој. Тој верува дека расправиите ги принудиле пратениците да ги видат придобивките од законот.