Трамп најави промени во прославите за 8 мај и 11 ноември: „Повторно ќе ги славиме нашите победи“

Претседателот на Соединетите Американски Држави, Доналд Трамп, објави дека за време на неговиот мандат, Белата куќа ќе направи одредени промени поврзани со одбележувањето на одредени датуми поврзани со Првата и Втората светска војна.

Во оваа пригода, Трамп на социјалната мрежа Truth Social зборуваше за прославата на 8 мај, кој во Европа се слави како Ден на победата над фашизмот.

„Многу од нашите сојузници и пријатели го слават 8 мај како Ден на победата, но ние направивме повеќе од која било друга земја, убедливо, во создавањето победнички исход во Втората светска војна. Со ова го преименувам 8 мај во Ден на победата во Втората светска војна, а 11 ноември во Ден на победата во Првата светска војна“, изјави Трамп.

Тој, исто така, истакнува како Америка ги доби обете војни.

„Ги добивме обете војни, никој не ни се приближи по сила, храброст или воена брилијантност, но никогаш не славиме ништо – тоа е затоа што повеќе немаме лидери кои го знаат тоа! Ќе почнеме повторно да ги славиме нашите победи“, заклучи Трамп.

Патем, објавата на Трамп доаѓа еден ден откако руските медиуми објавија дека американскиот државен секретар Марко Рубио ќе присуствува на воена парада организирана од Москва на 9 мај.

Американскиот Стејт департмент ниту ги потврди, ниту ги негираше овие тврдења на весникот „Звезда“, близок до руското Министерство за одбрана.

Посетата на Рубио на оваа парада, особено со оглед на целокупниот контекст, би била неверојатно изненадување.