Трасковски и Навроцки во тесна трка по првиот круг од претседателските избори во Полска

Центристичкиот проевропски кандидат и десничарот ќе се соочат во вториот круг на 1 јуни
Претседателските избори во Полска влегуваат во клучна фаза, откако проевропскиот либерал Рафал Трасковски и десничарот Карол Навроцки обезбедија речиси изедначен број на гласови во првиот круг. Според излезната анкета на Ипсос, Трасковски доби 30,8%, а Навроцки 29,1% од поддршката на гласачите.

Двајцата кандидати ќе се соочат во вториот круг, закажан за 1 јуни. Очекувањата се дека трката ќе биде крајно неизвесна. Официјалните резултати од првиот круг се очекуваат денеска или утре. Во изборната трка учествуваа вкупно 13 кандидати, а излезноста беше висока.

Трасковски, кандидат од Граѓанската коалиција на премиерот Доналд Туск и актуелен градоначалник на Варшава, во своето обраќање порача дека ќе продолжи со мобилизација до конечна победа:

„Цела Полска ќе победи!“, напиша тој на Фејсбук.

Гласовите на Менцен можат да бидат пресудни за исходот
Клучна улога во вториот круг од претседателските избори во Полска би можеле да одиграат поддржувачите на либертаријанскиот кандидат Славомир Менцен. Тој заврши на третото место со 15,4% од гласовите. Менцен, познат по својата антимигрантска и антиЕУ реторика, ги обвини украинските бегалци дека ја злоупотребуваат помошта на Полска. Тој доби симпатии од гласачи незадоволни од доминацијата на двете водечки политички сили.

Навроцки, поддржан од конзервативната партија Право и правда (ПиС), веднаш по изборите упати апел до гласачите на Менцен да му се приклучат за „да се спаси Полска“ и да се запре, како што рече, „монократијата на Доналд Туск“. Тој вети дека ќе биде нивен глас во претседателската палата.

Трасковски, пак, предупреди дека Навроцки претставува „радикална закана“ за демократијата и правосудниот систем, велејќи дека изборот на 1 јуни ќе биде „решавачки за иднината на полската демократија“.