УАПСЕН ЕДЕН ОД НАЈБОГАТИТЕ УКРАИНЦИ – СБУ го стави зад решетки човекот кој му ја обезбеди победата на Володимир Зеленски !?

Украинската служба за безбедност (СБУ) во саботата го обвини олигархот Игор Коломојски, кој беше цел на американски санкции во последните три години, за измама и перење пари.

Третманот на најистакнатиот претприемач, воедно и еден од најбогатите Украинци кој го поддржа претседателот Володимир Зеленски на изборите во 2019 година, доаѓа во време кога официјален Киев сака да докаже дека се бори со корупцијата дури и во време на војна.

„Утврдено е дека од 2013 до 2020 година Игор Коломојски легализирал половина милијарда гривни (14 милиони американски долари) со нивно исфрлање во странство користејќи ја инфраструктурата на банките под негова контрола“, соопшти СБУ.

Игор Коломојски претходно ги негираше сите обвинувања против него.

Тој претприемач, цел на американските санкции почнувајќи од 2021 година, се смета за еден од олигарсите кои по распадот на СССР во 1991 година натрупале огромно индустриско богатство, притоа добивајќи исклучително политичко и економско влијание.

Во предвечерието на војната, Володимир Зеленски реши да им ги скрати крилјата со закон кој бараше да се регистрираат и да не се мешаат во политиката.

Војната ја оштети нивната моќ бидејќи профитабилните индустриски комплекси беа тешко оштетени на југот и на истокот на земјата, а нивните телевизиски канали се емитуваат преку централизиран сигнал.

Володимир Зеленски негира дека Игор Коломојски имал какво било влијание врз Владата.

Двајцата пратеници, Јарослав Железњак и Ирина Герашченко, сметаат дека нападот врз Игор Коломојски има за цел да создаде позитивен публицитет за западните земји кои и помагаат на Украина во војната против Русија.

„Западните влади нема да пумпаат пари во обновата на земјата ако веруваат дека тоа само ќе ги наполни џебовите на олигарсите“, напишаа Јарослав Железњак и Ирина Герашченко на Телеграм.

Украина исто така аплицираше за членство во ЕУ, а Володимир Зеленски сака да обезбеди десетици милијарди долари за обнова на земјата.