УЕФА ги зголемува безбедносните мерки на ЕУРО

Европската фудбалска унија (УЕФА) најави дека ќе ги зајакне безбедносните мерки на натпреварите на Европското првенство, за да ги спречи навивачите да трчаат на теренот и да дојдат до играчите.

УЕФА соопшти дека ќе воведе дополнителни безбедносни мерки на 10 стадиони во Германија, но не откри повеќе детали.

На синоќешниот натпревар помеѓу Португалија и Турција (3:0), четворица навивачи истрчаа на теренот и стигнаа до Кристијано Роналдо со кој сакаа да се сликаат. Исто така, по натпреварот во Дортмунд навивачите се обиделе да дојдат до фудбалерот.

„Секое навлегување на теренот е кршење на правилата на стадионот и ќе доведе до исфрлање од стадионот, забрана за пристап на сите натпревари на турнирот и поднесување кривична пријава за навлегување “, се вели во соопштението на УЕФА.

За време на останатите натпревари на овогодинешното Европско првенство, навивачи во неколку наврати упаднаа на теренот.