УКРАИНЦИТЕ ИМААТ НОВА СТРАТЕГИЈА – Контраофанзивата (не)пропадна, изгубија многу моќни оружја, а до целта имаат уште 88 километри
Претседателот на Украина, Володимир Зеленски, призна дека контраофанзивата напредува побавно од очекуваното, бидејќи украинските војници бараат дупки во руските одбранбени линии.
Украинската Армија досега окупираше само осум од вкупно 96 километри што се надева дека ќе ги помине за да стигне до Азовското Море и да ги преполови руските сили на југот на земјата. Тоа е примарна цел на контраофанзивата – да се пресече копнениот мост кон полуостровот Крим и да се направи хаос во руската логистика. На друго место на бојното поле, напредокот на украинските сили е уште побавен. Во близина на Орихив во регионот Запорожје, каде што се распоредени повеќето оклопни борбени возила од западно производство, како што се американските оклопни возила Bradley и германските тенкови Leopard, украинската Армија напредуваше помалку од два километри.
На почетокот на јуни, во првите две недели од контраофанзивата, дури 20 отсто од оружјето што Украина го испрати на бојното поле беше оштетено или уништено. Откако претрпеа големи загуби, Украинците направија стратешка пауза за да ја преиспитаат својата стратегија, фокусирајќи се повеќе на исцрпување на руските сили со артилерија и ракети со долг дострел отколку на напад на непријателските мински полиња. Стапката на жртви падна за околу 10 отсто во следните недели, а Украинците тврдат дека успеале да сочуваат доволно војници и оружје за големата офанзива за која велат дека допрва доаѓа.
Украинската 47-ма механизирана бригада, една од трите единици обучени и опремени со западно оружје, имаше 99 оклопни возила Bradley на почетокот на контраофанзивата. Според холандскиот софтвер со отворен код Oryx, од нив, 34 биле напуштени, оштетени или уништени. Бидејќи 47-та бригата беше единствената бригада која првично требаше да го прими ова американско оклопно возило, тоа значи дека една третина од тие возила се изгубени.
„Значајното ниво на изгубено оружје генерално е карактеристика на војните за трошење како онаа во Украина“, изјавил Дилан Ли Лерке, аналитичар од британската безбедносна разузнавачка фирма Janes за весникот New York Times. Воените експерти се согласуваат дека првите 25 километри од контраофанзивата се најтешки бидејќи на напаѓачките трупи им треба три пати поголема сила – било во оружје, човечка сила или и двете – од одбранбените сили.
Податоците на Oryx покажуваат и дека само во јуни Украинците изгубиле 24 тенкови, вклучувајќи и осум тенкови Leopard од германско производство. Се претпоставува дека тие биле изгубени за време на битката од страна на украинската 33-та механизирана бригада, единица која примила 32 германски тенкови на почетокот на офанзивата. Ова значи дека бригадата изгубила 25 отсто од своите тенкови Leopard во првите две недели од борбата.
Проблемите поради губењето на оружјето се најизразени на земјоделските полиња на југот на Украина, каде што се одвива најголемиот дел од контраофанзивата. Таму оклопните борбени возила Bradley секојдневно газат над противтенковски мини. Овие возила, кои тежат околу 34 тони, се дизајнирани да превезуваат војници низ области директно изложени на оган. При планирањето на контраофанзива, Bradley требаше да превезуваат војници низ отворени полиња за да стигнат до руските ровови и бункери. Досега, Bradley добро го завршија својот дел – нивниот цврст оклоп обезбедуваше заштита за повеќето војници кои се бореле во нив. Но, во многу случаи експлозиите сериозно ги оштетиле возилата, имобилизирајќи ги многу пред да стигнат до руските линии.
Врховниот командант на украинските сили Валериј Залужни изрази фрустрација што Украина се бори без западните воени авиони F-16, за кои САД неодамна се согласија да им дозволат обука на украинските пилоти, но кои не се очекува да бидат испорачани уште најмалку неколку месеци. Ова ги остави украинските војници ранливи на напади од руски хеликоптери и артилерија. Странските воени аналитичари предупредуваат дека се уште е рано да се донесат конечни заклучоци за контраофанзивата. Сепак, тие се согласуваат со прогнозата дека отсуството на воздушна супериорност и воздушна одбрана на Украина значи дека стапките на жртви веројатно ќе бидат повисоки отколку во другите конвенционални конфликти.
