Утринскитe тајни на најбогатите и најуспешните: Не е толку лесно како што изгледа
Најуспешните луѓе во светот имаат утрински рутини кои, според нив, ги подготвуваат за успех. Истражувањата покажуваат дека начинот на кој го започнувате денот силно влијае врз вашата енергија, креативноста и среќата.
Артур Брукс, професор на „Харвард“ кој предава предмет за управување со среќата, напишал серија утрински навики од кои секојдневно прави избор, во зависност од расположението и потребите, за да си го подобри своето расположение и да го одржува во текот на денот.
– Сè што научив од бихевиоралната наука и биологијата го искористив за да направам утрински протокол што придонесува за мојата благосостојба – вели Брукс.
Во продолжение е претставена неговата утринска рутина и советите што секој може да ги примени за да го започне денот на најдобар можен начин.
Шест чекори од утринската рутина на Артур Брукс
Будење пред зори – Истражувањата покажуваат дека будењето пред изгрејсонце може да ги подобри креативноста, концентрацијата и меморијата. Брукс се буди секое утро околу 4:30 часот и тврди дека тоа значително му го подобрило менталното здравје.
Физичка активност – „Петнаесет минути по будењето веќе сум во сала“ вели Брукс, кој има сопствена домашна фитнес-сала. Вежба еден час дневно, седум дена во неделата, менувајќи кардио и тренинг за сила.
Духовен мир – По примерот на далај-лама, Брукс секое утро практикува своја верзија на аналитичка медитација. Понекогаш оди на миса, а понекогаш се моли во автомобил, што го нарекува „калибрирање на душата“. За оние што не се религиозни, препорачува водење дневник 20 до 30 минути секое утро како замена за духовната практика.
Одложување на првото кафе – „Го обожавам кафето, но не го пијам веднаш штом ќе станам. Првата шолја ја пијам околу 7:30 часот“, вели тој. Според него, оваа навика го спречува попладневниот пад на енергијата што обично се јавува околу три часот.
Протеински појадок – Брукс секојдневно внесува меѓу 175 и 200 грама протеини, а околу 60 грама добива уште со појадокот. Јаде безмасен грчки јогурт без вкус, со додаток на протеин од сурутка, ореви и шумски плодови.
Фокусирање – Наместо да ја троши утринската енергија на е-пораки, повици или вести, Брукс веднаш започнува со најважниот дел од својата работа. „Во тоа време можам да остварам околу два часа исклучително квалитетна и креативна работа. Потоа останувам фокусиран и продуктивен целиот ден“, објаснува тој.
