ФИФА го претстави официјалното лого за Светското првенство 2026
ФИФА денес го откри официјалното лого за Светското првенство 2026 во опсерваторијата Грифит во Лос Анџелес, Соединетите Американски Држави (САД).
Новото лого на најголемото фудбалско натпреварување, што ќе се одржи во Канада, Мексико и САД, го претставија претседателот на ФИФА, Џани Инфантино, и бразилската фудбалска легенда Роналдо Назарио.
На него е прикажана слика на трофејот на Светскиот куп на ФИФА во преден план и годината на турнирот во заднина.
„Инфантино, исто така, започна кампања #WeAre26, која има за цел да ги поттикне луѓето, местата и заедниците да играат интегрална улога во започнувањето на настанот“, се вели во соопштението за печатот, пренесе ТРТ БАЛКАН.
„’Ние сме 26′ е повик за собир. Тоа е момент кога три земји и цел континент се собираат за да кажат: ‘Ние сме обединети да го пречекаме светот и да го дадеме најголемото, најдоброто и најинклузивното Светско првенство на ФИФА досега’“, изјави Инфантино.
Светското првенство во фудбал во 2026 година е закажано за јуни и јули 2026 година.
