ФОТО\ВИДЕО | ПОГЛЕДНЕТЕ КАКО ИЗГЛЕДАШЕ ПОЈАСОТ ГАЗА ПРЕД ВОЈНАТА – Палестински новинар објави снимка која сега изгледа речиси нереална
Кон крајот на минатата недела, палестинскиот новинар Јусеф Алхелу објави на социјалната мрежа Тик Ток компилација од видеа на кои се гледа како изгледал животот во северниот дел на Појасот Газа пред нападот на Хамас врз Израел што се случи на 7. октомври, пренесува Daily Mail.
Едно видео покажува како млади и стари пливаат во Средоземното Море и играат на плажите, додека други прикажуваат фудбалски натпревари, луѓе кои купуваат овошје на пазари на отворено и ловат риба во морето.
По споменатиот напад, во кој беа убиени приближно 1.200 Израелци, Израел почна да го бомбардира Појасот Газа. Палестинската воено-политичка организација Хамас, која е на власт во Појасот Газа, соопшти дека во тие бомбардирања загинале речиси 15 илјади луѓе, главно цивили.
Повеќе од 39.000 корисници го следат Јусеф Алхелу на Тик Ток, а медиумската агенција Reuters на својата веб-страница напиша дека Палестинецот работи како новинар од 2007 година и дека соработувал со бројни локални и меѓународни медиумски куќи, вклучително и британската национална јавна телевизија BBC . Reuters додаде дека Јусеф Алхелу е еден од најпознатите новинари во Појасот Газа и дека покрива уметност, спорт и хуманитарни прашања.
Палестинецот со години ги следи конфликтите на Блискиот Исток, а известуваше за војната во Појасот Газа што се случи на крајот на 2008 и почетокот на 2009 година и за израелската операција во Појасот Газа што се случи во ноември 2012 година.
Јусеф Алхелу управува и со профилот на Gaza TV News на социјалната мрежа Фејсбук, кој го следат 396 илјади корисници.
