ФОТО | Јован Митрески избран за претседател на Собранието
Собранието денеска со 64 гласови „за“ и 40 „против“ го избра Јован Митрески за претседател на Собранието.
Јован Митрески, кој беше досегашен координатор на пратеничката група на СДСМ, ќе биде претседател на Собранието до изборот на нов состав на Парламентот по изборите на 8. мај, и откако неговиот претходник Талат Џафери беше предложен за мандатар на техничката Влада, која треба да биде избрана во недела на 28. јануари.
„Како секој пратеник, така и за мене изборот за претседател е голема чест, но пред се одговорноста е уште поголема. Во таа насока ве уверувам дека со посилен интензитет ќе продолжам да работам во интерес на функционалноста и ефикасноста на Собранието, секако во согласност со Уставот, со Деловникот, со законската регулатива, но пред се во интерес на граѓаните и државата“, порача Јован Митрески.
Изрази верување дека заеднички ќе продолжиме да ја јакнеме демократијата бидејќи за млади демократии како нашата тоа е важно да го правиме ској ден.
„Останувам отворен за соработка со сите пратенички групи, се додека гледам, мислам и чуствувам дека тоа што се прави од спротивната страна е во интерес на граѓаните и државата, затоа што интересот на граѓаните и на државата е врвен интерес на сите нас“, вели Јован Митрески.
Тој изрази благодарност за поддршката и за довербата која му ја дадоа пратениците со нивното гласање, како и до досегашниот претседател Талат Џафери и до генералната секретарка Цветанка Ивановска и до нејзините заменици за успешното менаџирање, како и до вработените во Собранието.
Новиот спикер даде свечена заклетва, по што како што е најавено ќе има примопредвање на фукцијата и куси изјави на Талат Џафери и Јован Митрески.
Бо расправата по предлогот зборуваа координаторите на пратеничките групи на СДСМ, ВМРО-ДПМНЕ, ДУИ и Димитар Апасиев од Левица. Пратениците од Европскиот сојуз на промени не присуствуваа на седницата за избор поради бојкот.
Фактот што зад Јован Митрески застанале пратеници од најголемиот број парламентарни партии во Собранието, според Мартин Костовски од СДСМ, зборува не само за кохезивниот потенцијал на Јован Митрески, туку и за довербата што пратениците ја имаат во него и неговото искуство да ја преземе функцијата без никаков проблем.
Осврнувајќи се на биографијата на Јован Митрески, посочи дека тој е човек кој целата своја енергија ја дава за подобар развој и подобра иднина на неговата држава. За пратеник во Собранието од редовите на СДСМ е избран во 2014 година, и во многу наврати, како што кажа, го покажал својот одговорен пристап во вршењето на функцијата пратеник и координатор на пратеничката група на СДСМ и коалицијата.
„Како координатор на СДСМ и коалицијата, но воден од принципите на одговорност пред граѓаните, целосно одговорно работејќи посветено за нивните интереси направи се да се унапреди дијалогот во Собранието“, истакна Мартин Костовски.
Спомна низа законски решенија и одлуки кои беа донесени во Собранието, а овозможиле државата да оди напред, меѓу кои и ратификацијата на Северноатланскиот договор со кој формално станавме 30 членка на НАТО.
„Граѓаните заслужуваат да ги водат политичари со интегритет на кои приоритет ќе им биде просперитетна иднина на државата, а не тесно партиските кусогледи интереси“, нагласи Мартин Костовски.
Координаторот на пратеничката група на ДУИ, Арбр Адеми изрази уверување дека со изборот на Јован Митрески за претседател, Собранието ќе продолжи да работи во согаласност со европски принципи и стандарди, правилата и процедурите предвидени во Уставот, во Деловникот за работа и законската регулатива, но и во интерес на граѓаните на РСМ.
„Сметам дека предлогот досегашниот кординатор на пратеничката група на СДСМ и коалицијата, Митрески да биде избран за претседател на Собранието е најдобриот избор што можевме да го направиме, доколку сакаме да продолжиме по патот кој сите го трасиравме изминативе речиси седум години. Верувајте дека како координатор на пратеничката група на ДУИ со посебна почит гледам кон господинот Џафери, учејќи од неговото искуство и мудрост, знаење, трпеливост и одговорност и токму затоа мојата одговорност како пратеник, координатор и како човек уште поголема довербата за нов претседател да ја дадам за оној кој ги поседува вредностите кои се неопходни да се обезбеди демократски напредок и развој на Собранието“, посочи Арбр Адеми.
Собранието на РСМ, нагласи, е место во кое сите ние како претставници на граѓаните треба да ги браниме нивните интереси, да се залагаме за унапредувањето на нивниот животен стандард, за подобри здравствени и социјални услуги, да обезбедиме европска иднина за нашите граѓани и за нашите деца. Место на кое треба да има натпревар на идеи, аргуметни, а победник треб ада биде интересот на граѓаните.
ВМРО-ДПМНЕ не гласаше Јован Митрески од СДСМ да биде претседател на Собранието до одржувањето на изборите.
Координаторот на опозициската партија Никола Мицевски соопшти дека Јован Митрески не може да го поправи она што се случувало во изминатите шест години во законодавниот дом затоа што и тој, како што рече, директно или индиректно бил учесник во процесите и настаните во кои наместо интересите на граѓаните, во прв план биле личните интереси и партиските пазари.
Зборувајќи за изминатите четири години „неработа и нефункционалност на Собранието“, кажа дека законодавниот дом бил „непресушен извор на самоволие“, место на преседани и недемократско однесување, дека Собранието потфрлило во улогата да се биде контрола на извршната власт, секојдневно се злоупотребувало европско знаменце кое „се лепело“ за секој закон што нема врска со ЕУ-интеграцијата.
„Во овој мандат видовме се и сешто, но не и европско собрание… Најмногу скандали и преседани во просек за ден. Деловникот на Собранието како никогаш досега беше погазуван и непочитуван и речиси немаше вредност и тежина, со негова селективна примена…Кршење на Етички кодекс на пратениците, среде Собранието беше погазуван и Уставот… Урнисавте и погазивте речиси се што може да се погази, ова мнозинство покажа огромна неконзистентност во ставовите и политички акробации, се со цел да се задржи гола власт по секоја цена и личните интереси да бидат пред интересите на народот“, кажа Никола Мицевски.
Соопшти дека во овој мандат биле прифатени само три од 60 предлог-закони што ги поднела ВМРО-ДПМНЕ и коалицијата. Уште „не виделе бел ден“, како што рече, ниту пет информации што ги поднеле за разгледување, декларации и предлог-одлуки, а на дневен ред на седница не дошле ни шест интерпелации што ги поднеле за работата на именувани носители на функција.
Првпат во неговата историја во Собранието, додаде тој, се заклучувале вратите во пленарна сала и се ограничило слободното движење на пратеници зашто владејачкото мнозинство не можело да обезбеди кворум и првпат имало судска пресуда за опозициски пратеник за искажан збор од собраниска говорница.
Како никогаш досега, кажа координаторот на ВМРО-ДПМНЕ, не била толку критикувана работата на Собранието од Европската комисија, од други меѓународни и невладини институции и од јавноста.
Димитар Апасиев од Левица, кажа куса како што кажа песна и прака на струшки дијалект.
