Француските партии се здружуваат против Ле Пен

Екстремно десничарската партија Национално собрание (РН) на Марин Ле Пен направи историски пробив за да победи во првиот круг од француските парламентарни избори, но конечниот исход ќе зависи од периодот на градење сојуз пред вториот круг следната недела. Сепак, лидерите на левичарскиот Нов народен фронт и центристичката алијанса на Макрон се договорија да формираат заеднички фронт против екстремната десница.

РН и сојузниците имаа 33 отсто од гласовите, потоа левиот блок со 28 отсто и центристите на претседателот Емануел Макрон со само 20 отсто, покажаа денеска официјалните резултати од Министерството за внатрешни работи.

Тоа беше голем неуспех за Макрон, кој свика предвремени избори откако РН го порази неговиот сојуз на изборите за Европскиот парламент минатиот месец.

Но, дали антиимигрантската, евроскептична РН ќе успее да формира влада, ќе зависи од одлучувачкиот круг следната недела и колку успешно другите партии ќе успеат да ја спречат Ле Пен со собирање на најдобро пласираните ривалски кандидати во изборните единици низ Франција.

Водачите и на левичарскиот Нов народен фронт и на центристичката алијанса на Макрон во неделата вечерта јасно ставија до знаење дека ќе ги повлечат своите кандидати во областите каде што другиот кандидат е во подобра позиција да ја победи РН во вториот круг следната недела.

Ле Пен се обиде да го исчисти имиџот на партијата позната по расизам и антисемитизам, тактика која функционираше во услови на гнев кај гласачите кон Макрон, високите трошоци за живот и зголемената загриженост за имиграцијата.