Фудбалско прашање на „Милионер“ го чинеше 125.000 евра: Дали го знаете одговорот за финалето на Светското првенство?

Натпреварувачот Марк Офенбахер во германската верзија на квизот „Кој сака да биде милионер“ се заглави на дофат на целта од 125.000 евра бидејќи не успеа на фудбалско прашање кое за вистинските љубители на овој спорт не би требало да биде толку тешко.

Офенбахер стигна до 13-то прашање од квизот, а три точни одговори го делеа од освојување на милион евра.

Сепак, како што самиот призна, тој не е љубител на фудбалот и е заглавен на прашање на кое многу фудбалски експерти би знаеле да одговорат.

„Кој е најчестиот конечен резултат на финалињата на Светското првенство?“ беше прашањето.

Понудените одговори беа: A – 1:0, B – 2:1, C – 3:1 и D – 4:2.

Натпреварувачот не го знаел точниот одговор, па затоа ја користел помошта 50:50. Во оваа прилика, два неточни одговори биле елиминирани, оставајќи еден точен и еден случајно избран неточен одговор.

Дури и тогаш, тој не можеше да се одлучи помеѓу резултатот „2:1“ или „4:2“, па затоа употреби нов џокер – помошта на одреден натпреварувач од публиката.

По краткиот разговор со член од публиката, тој одговори под Б „2:1“. За жал, тоа беше неточен одговор.

Водителот Гинтер Јаух објасни дека точниот одговор под D е „4:2“, иако ова е редок резултат во фудбалот. Се случило четири пати во финалињата на Светското првенство.

Ова се случи во 1930 година кога Уругвај ја победи Аргентина, во 1938 година кога Италија ја победи Унгарија, во 1966 година кога Англија ја победи Западна Германија и во 2018 година кога Франција ја победи Хрватска.

Наместо 125.000 евра, што ќе ги добиеше доколку го дадеше точниот одговор, или 64.000 евра доколку се откажеше пред ова прашање, натпреварувачот Марк на крајот си замина дома со утешна награда од само 500 евра.