Цената на „металот на иднината“ оди на 40.000 долари за тон?

Бакарот е клучен метал за енергетската транзиција.

Цената на бакарот на берзата може да се зголеми четирикратно во следните неколку години до 40.000 долари за тон бидејќи зголемената побарувачка предизвикува намалување на глобалните залихи на црвениот метал, според Пјер Андуран, менаџер на хеџ фонд специјализиран за инвестирање во суровини.

Неговото верување во растот на цените му помогна на неговиот фонд Commodities Discretionary Enhanced, кој управува со имотот од 1,3 милијарди долари, да се врати од загубата од 55 отсто минатата година поради погрешно обложување за пад на цената на нафтата. Фондот е зголемен за 83 отсто оваа година благодарение на добивките во широк опсег на стоки, пишува Фајненшл тајмс.

Бакарот е клучен метал за енергетската транзиција. Неговата цена од почетокот на годината порасна за речиси 20 отсто, достигнувајќи рекордни 11.000 долари за тон. Андуран, еден од најпознатите светски трговци со стоки, верува дека цената ќе продолжи да расте додека понудата се бори да остане во чекор со побарувачката.

„Ние се движиме кон удвојување на растот на побарувачката на бакар поради електрификацијата на светот, вклучувајќи електрични возила, соларни панели, ветерни електрани, но и воена употреба и центри за податоци“, рече Андуран за ФТ.

„Мислам дека би можеле да достигнеме 40.000 долари за тон во следните четири години. Не велам дека ќе остане таму; на крајот ќе добиеме одговор на понудата, но таа реакција на понудата ќе трае повеќе од пет години“, смета тој.