Што ќе одлучи арапскиот свет! Лидерите се сретнаа во Египет за да го разгледаат контрапредлогот на планот на Трамп за Газа!
Арапските лидери денеска се состануваат во Каиро за да разговараат за контрапредлогот на Египет на планот на американскиот претседател Доналд Трамп за раселување на палестинското население во Појасот Газа и трансформирање на територијата во луксузно одморалиште.
Контрапредлогот предвидува Палестинците да се преселат во безбедни области во Газа опремени со мобилни домови и засолништа, додека градовите се обновуваат. Хамас ќе ја предаде власта на привремена администрација на политички независни тела, додека реформираната палестинска управа не ја преземе контролата.
Трамп претходно го шокираше регионот и светот кога предложи околу два милиони жители на Газа да се преселат во други земји. Тој рече дека САД ќе ја преземат сопственоста на територијата разурната од војна и ќе ја трансформираат во, како што рече, блискоисточна ривиера.
На самитот, чиј домаќин е египетскиот претседател Абдел Фатах ел Сиси, се очекува да присуствуваат лидерите на регионалните сили Саудиска Арабија и Обединетите Арапски Емирати, чија поддршка е клучна за секој повоен план.
Од друга страна, Израел го прифати алтернативниот предлог на САД за прекин на огнот и ослободување на заложниците. Тој го блокираше влезот на храна, гориво, лекови и други залихи во Газа во обид да го натера Хамас да го прифати предлогот и предупреди на дополнителни последици, што ги зголеми стравувањата од враќање на војната.
