Јаневска: Градиме образовен систем кој ќе ги исполни целите на Стратегијата за паметна специјализација
„Македонија има Стратегија за паметна специјализација која ги дефинира областите каде што има потенцијал за развој. Најважниот ресурс за постигнување на дефинираните цели е човечкиот капитал и токму во оваа насока го обликуваме образованието, за да создадеме рамка што е неопходна во приоритетните области на економијата.“ Ова денес го истакна министерката за образование и наука, Весна Јаневска, на Светскиот образовен форум што се одржува во Лондон, каде што учествува на панел-дискусија за влијанието на стручното образование врз економскиот раст.
„Стратегијата за паметна специјализација нè води кон дигитална и зелена транзиција во областите на земјоделство со повисока додадена вредност и паметна храна, информациски и комуникациски технологии, електромеханичка индустрија и одржливи материјали и паметни згради. Во овие области е потребен стручен кадар и поради оваа причина сме фокусирани на унапредување и промоција на средното и високото стручно образование“, рече Јаневска.
Министерот информираше дека средното стручно образование во Македонија е целосно модернизирано, се имплементираат модуларни наставни програми, има добро обучени наставници, а компаниите исто така учествуваат во образованието на учениците.
„Во 2017 година го воведовме концептот на дуално образование, или учење преку работа, и тој постојано се шири. Компаниите се вклучени во развивање на практични вештини кај младите луѓе, а денес 70% од вкупниот број средношколци учат во средните стручни училишта во Македонија“, нагласи Јаневска, нагласувајќи дека во високото образование фокусот е ставен и на техничките науки, но дека има простор за продлабочување на соработката меѓу универзитетите и бизнис секторот.
Јаневска е првата министерка за образование која се обратила на Светскиот образовен форум во Лондон, кој е најголемиот глобален собир на министри за образование и вештини и има традиција од повеќе од 20 години. Панелисти, покрај министерот, беа и министерката за образование, наука и истражување на Маврициус, Сукон Кавирај Шарма, и директорот на ОЕЦД за образование и вештини, Андреас Шлихер.
