Јасна порака на Џо Бајден по средбата со Риши Сунак: “Односите меѓу САД и Велика Британија се цврсти како камен!“
Претседателот на Соединетите Американски Држави (САД), Џо Бајден, изјави во понеделникот дека односите со Велика Британија се „цврсти како камен“ за време на разговорите во Лондон со британскиот премиер Риши Сунак, пренесува BBC.
Риши Сунак ги поздрави Велика Британија и САД како „двата најсилни сојузници“ во НАТО.
Тие, исто така, разговараа за потегот на САД да и дадат на Украина контроверзни касетни бомби за да се одбрани од руска инвазија.
Исто така, најавено е дека украинската кандидатура за членство ќе биде високо на агендата на самитот на НАТО во вторник.
Сите 31 членка на НАТО кои ќе присуствуваат на самитот во Вилнус, Литванија, се согласуваат дека Украина не може воено да се приклучи на Алијансата за време на војната поради страв дека тоа ќе доведе до директен конфликт со Русија.
Самиот украински претседател Володимир Зеленски изјави дека не очекува Киев да се приклучи на блокот до крајот на војната, но сака да добие „јасен сигнал“ за кандидатурата на Украина на самитот.
Неколку членки на НАТО во Источна Европа се залагаат за брзо членство на Украина, но други, вклучително и САД, се колебаат бидејќи стравуваат дека тоа би можело да доведе до директен конфликт со нуклеарно вооружената Русија.
Во изјава за CNN, претседателот Џо Бајден кажа дека кандидатурата на Украина за членство е „предвремена“.
Осврнувајќи се на американското ветување за испорака на касетни бомби во Украина, што предизвика вознемиреност кај сојузниците во НАТО, официјалниот портпарол на Риши Сунак кажа дека тоа било тешка одлука за САД.
Сепак, тој додаде дека тие биле „присилени“ на таа одлука од руската агресивна војна.
Оружјето е забрането во повеќе од 100 земји, вклучително и Велика Британија, поради опасноста што ја претставува за цивилите.
Русија, Украина и САД не ја потпишаа Конвенцијата за касетна муниција, која забранува нивно производство, складирање, употреба и пренос.
„Ние остануваме на нашите обврски од конвенцијата, кои вклучуваат обесхрабрување на нејзината употреба. Нема промени од наша страна по ова прашање, очигледно е дека зависи од секоја земја да донесе одлука“, рекол портпаролот на Риши Сунак.
САД велат дека добиле гаранции од Украина дека муницијата нема да се користи во Русија или во урбаните области.
Џо Бајден во понеделникот имаше и одделни разговори со кралот Чарлс III во замокот Виндзор, што беше нивна прва средба откако кралот беше официјално крунисан во мај.
