Јутјубер намерно урнал авион заради прегледи на интернет: Осуден е на шест месеци затвор

Американскиот јутјубер Тревор Џејкоб (30) е осуден на шест месеци затвор за намерно уривање на неговиот авион во 2021 година за да добие што е можно повеќе прегледи на интернет и за тоа што дал лажни изјави пред американските инспектори.

Тревор Џејкоб (30) објави видео од авионската несреќа во декември 2021 година, тврдејќи дека се работи за несреќа. Тој скокна од авионот – стап за селфи во рака – и падна со падобран на земјата.

Тој објави видео на YouTube со наслов „I Crashed My Plane“, кое собра повеќе од четири милиони прегледи. Видеото содржеше и оглас за компанија која произведува паричници, соопштија обвинителите.

Федералните обвинители во американската сојузна држава Калифорнија во понеделникот изјавија дека Џејкоб најверојатно го сторил кривичното дело за да добие што е можно повеќе прегледи на социјалните мрежи и да добие финансиска корист, пренесе Би-би-си.

„Овој вид невнимателно однесување не може да се толерира“, додаваат обвинителите.

Џејкоб, поранешен олимпиец во сноуборд, рече дека судот ја донел „точната одлука“. Во спогодбата за признавање вина, тој изјавил дека видеото го направил како дел од договор за спонзорство на производ.

Џејкоб се изјасни за виновен претходно оваа година по обвиненијата за кривично дело „уништување и прикривање со намера да се попречи федералната истрага“. Тој ја снимил авионската несреќа со повеќе камери по полетувањето од аеродромот Ломпок со самостоен лет на Тејлоркрафт БЛ-65 до езерата Мамут, Калифорнија.

По 35 минути лет, тој скокнал од авионот додека летал над шумата и се снимил како скока со падобран на земја. Тој, исто така, снимил како авионот вртоглаво паѓа со сопствената камера, како и со други камери поставени на крилата и опашката на авионот.

По слетувањето, Џејкоб отишол на местото на несреќата и пронашол снимка од камерата, соопшти американската влада.

Како што откри истрагата, Џејкоб и неговиот пријател потоа полетале со хеликоптер до местото на несреќата и го влечеле паднатиот авион до округот Санта Барбара, каде Џејкоб го ставил во хангар. Тој во текот на неколку дена уништил делови од урнатините, како што велат претставници на властите, со цел да ја попречи истрагата.

Федералната управа за авијација му ја одзеде дозволата за пилот на Џејкоб во април 2022 година, велејќи дека тој „покажал недостаток на грижа, расудување и одговорност“.

Оттогаш, на неговиот канал на YouTube се појави видео во кое тој тврди дека лиценцата му е вратена.