„Ќе ги повторуваме нападите во стилот на 7 октомври, се додека не го уништиме Израел“- претставник на Хамас со сериозни закани
Претставникот на Хамас, Гази Хамад најави дека групата ќе продолжи да го напаѓа Израел „во стилот на нападите на 7 октомври“.
Во интервју за либанската телевизија ЛБЦ, чиј дел беше пренесен од Мемри, истражувачка организација со седиште во Вашингтон, тој ги бранеше нападите на Хамас на 7 октомври во кои загинаа 1.400 Израелци, по што Израел започна инвазија на Појасот Газа, која сега влезе во копнена фаза.
Интервјуто е снимено на 26 октомври.
– Израел е земја на која не ѝ е местото на нашата (палестинска) земја. Таа нација мора да замине бидејќи претставува воена и политичка закана за безбедноста на арапските и исламските земји и мора да биде уништена. Не се срамиме да го кажеме тоа одлучно. Мора да го натераме Израел да плати за своите постапки и тоа ќе го правиме постојано. Ќе има втор, трет и четврти (напад) затоа што имаме волја, решителност и способност да се бориме – рече тој.
– Ќе има ли жртви? Навистина, и ние сме подготвени да платиме за нив. Горди сме што жртвуваме маченици затоа што сме познати како народ на маченици – додаде тој.
– Не сакавме да им наштетиме на цивилите, но имаше компликации на теренот, и имаше забава во таа област со (цивилното) население – рече тој, мислејќи на фестивалот што Хамас го нападна на 7 октомври, убивајќи и киднапирајќи посетители.
Додаде дека се работи за огромна површина која се простира на 40 километри.
– Окупацијата мора да заврши – рече Хамад, додавајќи дека не зборува само за Газа туку за „целата палестинска земја“, алудирајќи на уништување на Израел.
– Постоењето на Израел е нелогично. Изворот на сите страдања, крвопролевања и солзи е постоењето на Израел. Не ние, туку Израел. Ние сме жртви на оваа окупација. Засекогаш – рече тој.
– Се што направивме на 7, 10 октомври, беше оправдано – рече Хамад.
Во меѓувреме, израелската војска соопшти дека Хамас го користи народот во Газа како „човечки штит“ и дека земјата решително ќе продолжи да го уништува Хамас.
– Населението во Газа продолжува да ја плаќа цената на злосторствата на Хамас. Ова е војна која не ја сакавме ниту ја започнавме. Сега одговараме на уназадувањето на Хамас – изјави портпаролот на ИДФ, Џонатан Конрикус.
Израелскиот воздушен напад врз бегалскиот камп во Џабалија во северниот дел на Газа предизвика катастрофални штети, при што загинаа или беа ранети околу 400 луѓе. Во крвавиот конфликт на Блискиот Исток досега загинаа 8.796 Палестинци, од кои 3.648 деца и повеќе од 1.400 Израелци, а експертите проценуваат дека војната може да се прошири и во соседните земји.
