Џафери – Лосон: Обединетото Кралство има клучна улога во градењето европска демократија во Северна Македонија

– Претседателот на техничката Владата на Република Северна Македонија, Талат Џафери, се сретнал со амбасадорот на Обединетото Кралство на Велика Британија и Северна Ирска во земјава, Метју Лосон, соопштија денеска од владината прес – служба.

На средбата, како што стои во соопштението, биле потврдени силните партнерски односи кои Северна Македонија и Велика Британија ги негуваат во рамки на НАТО, како и воспоставените трговски и економски односи кои се на високо ниво меѓу двете земји.

– Премиерот Џафери ја потенцираше важноста што Обединетото Кралство е нашиот втор трговски партнер и е втор по обем странски директен инвеститор во Северна Македонија. Воедно, Северна Македонија е најголемиот трговски партнер на Обединетото Кралство на Западен Балкан, а британските бизниси во земјава постојано се зголемуваат, што беше повод за создавањето на британско-македонската стопанска комора, се наведува во соопштението.

Амбасадорот Лосон, на Џафери му го честитал изборот за претседател на Владата и истакнал дека овој историски чекор е потврда дека земјата е позитивен модел на мултикултурализам и пример за други земји.  

Премиерот Џафери му се заблагодарил на амбасадорот Лосон за силната посветеност на Обединетото Кралство за евро-атлантските интеграции на Северна Македонија, истакнувајќи ја клучната улога на Велика Британија во градењето на нашата земја како независна европска демократија во последните три децении.

Џафери и Лосон, се додава во соопштението, разговарале и за актуелни теми врзани за внатрешно-политичката состојба во земјата и активностите на Владата во подготовката на претстојните двојни избори.