Џафери – Шинас: Северна Македонија е конструктивен партнер на ЕУ во областа на миграциите и визната политика 

– Претседателот на техничката Влада на Република Северна Македонија, Талат Џафери, во рамки на Минхенската безбедносна конференција, се сретнал со потпретседателот на Европската комисија и еврокомесар за промовирање европски начин на живот, Маргаритас Шинас, соопшти владината прес-служба.

На средбата се разговарало за повеќе актуелни прашања од значење за Северна Македонија и за ЕУ, со фокус на миграциите, соработката со Фронтекс и претстојните двојни избори.

Еврокомесарот Шинас изразил благодарност за конструктивната поддршка и соработка со Северна Македонија во полето на миграциите и усогласувањето со визната политика на ЕУ. Посочил дека на земјата во претстојниот период ѝ е потребен мирен и демократски изборен процес во кој ќе преовлада позитивна европска атмосфера.

– Премиерот Џафери истакна дека јасната ЕУ перспектива останува главен двигател на промените во Регионот и нагласи дека Владата во претстојниот период ќе манифестира континуитет и конструктивност во исполнувањето на европската агенда, се наведува во соопштението.

Џафери истакнал дека соработката со Фронтекс и во 2023 година беше на многу високо ниво и еден од приоритетите беше операционализацијата на Договорот помеѓу Република Северна Македонија и Фронтекс.

Како што стои во соопштението, техничкиот премиер Џафери го запознал еврокомесарот Шинас со актуелностите на внатрешно-политички план и подготовката за организирање двојни избори. Притоа, потенцирал дека прогресивните европски сили во државата се на потег да се обединат и да го направат новиот исчекор во евроинтеграциите, во името на перспективите.