Apple најави уште една милијарда евра за фабриката за чипови во Минхен
Американскиот технолошки гигант ја удвои почетната инвестиција во својот најголем европски центар за развој на чипови на две милијарди евра.
Американскиот производител на компјутери Apple најави дека ќе инвестира уште една милијарда евра во дизајн на чипови во најголемиот европски центар за чипови во Минхен, пренесува Хина.
Со ова американскиот технолошки гигант ја удвои почетната инвестиција во најголемиот европски центар за развој на чипови на Apple, што го вети во 2021 година, на две милијарди евра.
Програмерите на Apple во центарот за дизајн на чипови во Минхен развиваат, меѓу другото, безжична технологија од петтата генерација (5G) и решенија за заштеда на енергија за чипови.
„Голема доверба во Баварија“
Во американската компанија се надеваат дека ќе станат независни од добавувачите на чипови, како што е Qualcomm, од кој досега купуваа чипови за петтата генерација мобилни комуникации (5G) за производство на паметни телефони iPhone.
Проширувањето на центарот ќе овозможи уште поблиска соработка помеѓу повеќе од 2.000 инженери во Баварија кои работат на нашиот дизајн на чипови, управување со енергија и нови безжични технологии, рече шефот за хардвер на Apple, Џони Сруџи.
Баварскиот министер за наука Маркус Блуме ги поздрави зголемените инвестиции на Apple, велејќи дека тоа сигнализира „огромна доверба“ во Баварија и нејзиниот научен и истражувачки капацитет.
