Google ги предупредува корисниците: Ако го направите ова на вашиот телефон, апликациите може да не работат правилно

Страничното вчитување, односно инсталирањето содржина од страна, станува сè поинтересна тема, особено по неодамнешните промени воведени од Apple и Google.

Корисниците на Android традиционално имаат навика да инсталираат апликации од страна, но неодамна почнаа да добиваат предупредувања од Google за вчитување надворешни апликации.

Практиката најпрво започна со предупредувања испратени до корисниците на Pixel кои преземаа ажурирања на апликации од страна по објавувањето на оперативниот систем Android 14 минатата година.

Еден корисник на Galaxy S23 Ultra го доби ова предупредување додека се обидуваше да инсталира ажурирање за апликацијата AccuWeather преземена од надворешна продавница за апликации.

– Ја ажурирате оваа апликација преку APK Mirror Installer (бета)? Оваа апликација обично добива ажурирања од продавницата на Google Play. Со ажурирање од друг извор, ќе можете да добивате идни ажурирања од кој било извор на вашиот телефон. Ова може да ја промени функционалноста на апликацијата. 

На корисникот му се нудат две опции: „Откажи“ или „Ажурирај во секој случај“.

Важно е да се напомене дека предупредувањето се појавува само еднаш. Ако преземете апликација од Play Store и потоа инсталирате ажурирање од надворешен извор, нема повторно да го добиете предупредувањето за следното ажурирање.

Сепак, може да се појави проблем ако ажурирањето од продавница за апликации од трета страна не вклучува некоја функционалност што беше достапна во претходната верзија на апликацијата.

Оваа практика на Google може да биде фрустрирачка за корисниците навикнати на странично вчитување апликации. Play Store има право да ги испраќа овие предупредувања, бидејќи од Android 14, продавницата од која првично сте ја инсталирале апликацијата се смета за сопственик на таа апликација и може да испрати предупредување во случај на ажурирање од друг извор.