Neuralink започна да регрутира луѓе за да започнат со тестирање на чипот

Технолошката компанија за нервен интерфејс на Илон Маск, Neuralink, регрутира кандидати за своите први клинички испитувања на луѓе.

Неуралинк во соопштението во вторникот рече дека студијата ќе ја процени безбедноста на нивните импланти и хируршки роботи, пренесува Телеграф.

Компанијата соопшти дека нивната првична цел со тестот „е да им дадат на луѓето способност да го контролираат курсорот на компјутерот или тастатурата користејќи ги само нивните мисли“.

Неуралинк додаде дека тестирањето е наменето за луѓе кои имаат квадриплегија поради повреда на цервикалниот ‘рбетниот мозок или амиотрофична латерална склероза (АЛС). АЛС е невромускулна болест која прогресивно го уништува нервниот систем и ја нарушува контролата на мускулите.

Маск ја основа Neuralink во 2016 година со тим од научници и инженери. Маск има големи надежи за работата на компанијата – тој во 2019 година рече дека се надева дека тоа може да му помогне на човештвото да постигне „симбиоза со вештачката интелигенција“.

На настан на компанијата минатата година, Маск рече дека ќе ги тестира мозочните чипови на Neuralink на себе кога ќе започне тестирањето на луѓе.

„Сега би можеле да вградите уред Neuralink, а не би го ни знаеле тоа. Мислам, хипотетички“, рече Маск.

Останува нејасно дали Маск ќе биде дел од овие рани човечки испитувања.

Neuralink доби одобрение од американската Администрација за храна и лекови (FDA) во мај да започне со тестирање на луѓе. Досега компанијата има спроведено само тестови на животни на свињи и мајмуни.

Во декември 2022 година, Ројтерс објави дека Neuralink е под федерална истрага за злоупотреба на благосостојбата на животните. Околу 1.500 животни – вклучувајќи овци, свињи и мајмуни – се убиени од почетокот на тестирањето во 2018 година, според Ројтерс.