Oсмани пред НАТО во својство на претседавач со ОБСЕ
Османи во обраќањето истакна дека и покрај нивната различна природа и цел, и НАТО и ОБСЕ имаат важна улога во зачувување на европската безбедност.
Претседавачот со ОБСЕ и министер за надворешни работи на Северна Македонија, Бујар Османи, во Брисел имаше свое обраќање пред Северноатлантскиот совет на НАТО, каде ја претстави програмата на Северна Македонија како претседавач со ОБСЕ во 2023 година, пренесува Агенција Анадолија (АА).
Според соопштението на Министерството за надворешни работи, пред Советот со кој претседаваше заменик-генералниот секретар на НАТО, Мирчеа Џоана, Османи ја истакнал важноста на улогата на НАТО и ОБСЕ во европската безбедносна архитектура и ја презентирал визијата на Северна Македонија како претседавач со ОБСЕ.
Тој посочи дека фокусот на претседавањето ќе биде ставен на луѓето и на вредностите и принципите на ОБСЕ што беа прекршени со руската агресија врз Украина.
„Агресијата на Руската Федерација против Украина ги потресе столбовите на нашата безбедност“, потенцираше Османи, додавајќи дека Украина ќе остане врвен приоритет и клучно безбедносно прашање. „Наш приоритет во сите три аспекти ќе биде да обезбедиме суштинска поддршка за Украина и нејзиниот народ“, рече Османи.
Тој пред присутните истакна дека агресијата кон Украина мора да престане, како и дека смртта на цивилите и пустошот се неприфатливи, а последиците и цената на оваа војна за цела Европа и за цел регион на ОБСЕ ги карактеризираше како жални и неподносливи.
„Цивилните страдања се причината за нашиот силен фокус на луѓето кои се први на удар од оваа агресија. Оние кои се директно изложени на војна и конфликти се плашат за своите животи, а пак оние кои се подалеку чувствуваат несигурност, вознемиреност и неизвесност. Нивниот начин на живот е доведен во прашање и нивното секојдневие е нарушено. Нашиот ангажман е пред сѐ за луѓето. Ова е нашето мото и движечката сила за годината што претстои“, истакна тој.
Османи во обраќањето ја спомена улогата на двете организации во промовирањето на контролата на оружјето и мерките за градење доверба и безбедност.
„И двете организации треба да ја одиграат својата улога кога станува збор за поддршка на Украина, но и за другите земји учеснички или партнерите. Тие ги имаат потребните алатки и механизми за да придонесат за поголема безбедност и стабилност“, потенцираше Османи.
Пред Северноатлантскиот совет на НАТО, Османи ги спомена и останатите кризни ситуации низ регионот на ОБСЕ, истакнувајќи дека Централна Азија и регионот на Југоисточна Европа ќе останат во фокусот. Тој најави зајакнување на теренските мисии на ОБСЕ и поддршка за севкупното присуство на терен.
На врвот на листата на приоритети на Северна Македонија како претседавач со ОБСЕ, Османи ги посочи и борбата против корупцијата и промовирањето на доброто владеење, наведувајќи дека тоа е заедничка „болест“ која го загрозува демократскиот и социоекономскиот раст.
Тој најави дека Организацијата ќе се посвети на поддршка на основните човекови права и промовирање толеранција и недискриминација како предуслови за општата безбедност.
Претседавачот со ОБСЕ, Османи, на крајот од своето обраќање ја истакна важноста на соработката меѓу ОБСЕ и НАТО.
„Многу ми е драго што стратешкиот концепт усвоен минатата година во Мадрид кристално јасно покажува дека НАТО има намера да ја зајакне нашата заедничка координација и соработка. Како претседавач со ОБСЕ, уверен сум дека сите можеме да имаме корист од оваа соработка, бидејќи работиме за да придонесеме во процесите за безбедност и стабилност во Европа и светот“, истакна Османи.
Пред обраќањето пред Северноатлантскиот совет на НАТО, Османи оствари средба со Џоана, каде имаше можност да оддаде признание за ангажманот на Џоана во својство на претседавач со ОБСЕ во 2001 година, кога неговите напори доведоа до поголема стабилност на земјата и регионот.
Во заедничката изјава Османи повтори дека и покрај нивната различна природа и цел, и НАТО и ОБСЕ имаат важна улога во зачувување на европската безбедност.
„И двете организации се засновани на принципи и вредности, кои во случајот на ОБСЕ, се грубо прекршени со воената агресија. Верувам дека има простор за соработка и треба да ги исцрпиме сите можности за да придонесеме за поголема безбедност во регионот на Европа, но и пошироко“, рече Османи.
