SpaceX на Маск ќе го гради противракетниот одбранбен систем на Трамп наречен „Златна купола“
Изградбата на противракетен одбранбен систем во САД, по барање на американскиот претседател Доналд Трамп, би можела да биде препуштена на група од три компании, вклучувајќи ја и SpaceX, во сопственост на милијардерот Илон Маск, кој исто така е близок соработник на Трамп.
Според Ројтерс, SpaceX поднел понуда заедно со компаниите Palantir и Anduril, а тендерот на кој аплицирале е поврзан со изградбата на клучните делови од „Златната купола“, како што ја нарече Трамп.
Покрај Маск, кој е еден од најблиските соработници на американскиот претседател, Трамп го поддржаа и сопствениците на уште две компании кои за време на претседателската кампања му донираа милионски суми.
Претставниците на трите компании се состанаа со високи претставници на администрацијата на Трамп и Пентагон во последните неколку недели за да го опишат нивниот план, кој ќе вклучува изградба и лансирање од 400 до повеќе од 1.000 сателити кои ќе орбитираат околу Земјата и ќе детектираат проектили и ќе ги следат нивните движења.
Посебна флота од 200 сателити за напад вооружени со проектили или ласери потоа би ги уништила непријателските проектили. Се очекува дека групата SpaceX нема да учествува во вооружувањето на сателитот.
Ројтерс, исто така, тврди дека SpaceX предложил систем каде американската влада ќе плаќа за нивните услуги секој месец, наместо да го поседува системот.
Некои претставници на Пентагон изразија загриженост за потпирање на модел на претплата за кој било дел од „Златната купола“. Ваквото уредување би било невообичаено за толку голема и клучна одбранбена програма.
Генералот на американските вселенски сили Мајкл Гетлајн ги водеше дискусиите за тоа дали SpaceX треба да поседува и управува со својот дел од системот. Други опции вклучуваат САД да го поседуваат и управуваат системот или владата на САД да го поседува додека изведувачите управуваат со операциите.
Пентагон го доби интересот на повеќе од 180 компании кои сакаат да помогнат во развојот и изградбата на „Златната купола“. Друг човек од Пентагон, поранешниот приватен инвеститор Стив Фајнберг, ќе биде клучен носител на одлуки за овој проект.
Некои експерти сметаат дека вкупната цена на „Златната купола“ би можела да достигне стотици милијарди долари. Пентагон постави неколку временски рокови за испорака на капацитети, почнувајќи од почетокот на 2026 година и продолжувајќи до оние што ќе бидат испорачани по 2030 година.
SpaceX процени дека прелиминарното инженерство и дизајнот на нивниот дел „Златна купола“ би чинел помеѓу 6 и 10 милијарди долари.
