ПРЕДИЗВИК ЗА НЕТАНЈАХУ – За прв пат од 1948 година Израел загуби територија во „Зелената линија“, нападот на Хамас е срам за Мосад
Ненадејниот напад од Појасот Газа врз Израел претставува еден од најголемите разузнавачки неуспеси на Израел во последните децении и претставува значителен удар за угледот на Мосад. Нападот извршен на 7 октомври ќе остави длабока трага во израелското општество.
Во саботата во раните утрински часови Хамас изврши неочекувано разорен напад од Појасот Газа на територијата на Израел. Нападот вклучуваше истрелување на илјадници ракети, како и упад преку копнената граница и морето, како и десант од параглајдеристи.
Безбедносниот аналитичар на Би-Би-Си, Френк Гарднер, нападот го нарече колосална разузнавачка катастрофа за Израел.
Тој изјави дека Израел има една од најобемните и најсофистицирани разузнавачки мрежи на Блискиот Исток, домашни и странски, и информатори вградени во милитантните групи, не само на палестинските територии, туку и во Либан, Сирија и на други места, но дека денес, на крајот на еврејски празник, фатени се на спиење.
Тој истакна дека и покрај сè, Хамас успеал да го испланира и изврши овој внимателно координиран напад врз Израел, навидум во целосна тајност.
„Дека Израел ќе возврати со голема сила е сигурно. Но, Израелците сега ќе се прашуваат зошто шпионите на нивната нација не го видоа ова и ја предупредија земјата за тоа“, заклучи Гарднер.
Тој изјави дека израелски владин претставник му рекол дека веќе започнала голема истрага за тоа како е можно израелската разузнавачка агенција да не го предвидела овој напад.
Според тврдењата на двете страни, членовите на Хамас окупирале најмалку една база на израелската армија на територијата што е меѓународно признаена како територија на Израел. Ова е првпат од 1948 година Палестинците да ја окупираат територијата на Израел во рамките на „зелената линија“, односно меѓународно признатата граница.
Исто така, според снимката, најмалку еден модерен израелски тенк Мераква IV бил уништен во борбите, а еден бил барем привремено заробен.
Нападот доаѓа речиси на годишнината од војната во Јом Кипур, која започна на 6 октомври 1973 година, на еврејскиот празник Јом Кипур, со ненадеен напад на арапските војски. Војната заврши кога израелските трупи беа во близина на Дамаск и опкружени од египетската војска, но се смета за успех во арапскиот свет бидејќи, за разлика од Шестдневната војна, арапските војски беа речиси еднакви со израелската армија.
Исто како и пред 50 години, Израел беше фатен без стража, но сега Израел не е соочен со организирана армија од различни народи, туку со Хамас, кој главно се состои од лесна пешадија со импровизирана воена опрема.
Не треба да има сомнеж дека одговорот на Израел и најрадикалната израелска влада во последните години ќе биде остар со силно бомбардирање на Појасот Газа, но и евентуална повторна окупација на Појасот Газа од кој Израел се повлече во 2005 година.
За премиерот на Израел Бенјамин Нетанјаху следува уште еден политички тежок период. Дури и апсолутна воена победа нема да го отстрани од неговата влада белегот на разузнавачката катастрофа што се случи во саботата наутро, а медиумите веќе го критикуваа фактот дека му беа потребни речиси пет часа да и се обрати на израелската јавност по почетокот на нападот. За Нетанјаху, предизвик ќе биде и прашањето за заробените израелски војници и цивили кои беа однесени во Појасот Газа и нивното ослободување.
Нападот дојде и во време на преговори меѓу Саудиска Арабија и Израел за меѓусебно признавање и прашање е како тоа ќе влијае на односите кои почнаа да се подобруваат. Ако треба да се суди според слични ситуации досега, израелските воздушни напади ќе предизвикаат големи страдања во Појасот Газа, како кај цивилното население, така и кај цивилната инфраструктура, а тоа ќе предизвика гнев кај арапските држави.
